Artikel verskaf deur TWR Africa
Peter, wat in Kenia se enorme Kakuma-vlugtelingkamp woon, het ’n boodskap gehoor wat sy lewe verander het. “Die gesprek oor dwelmverslawing het direk met my gepraat,” het hy geskryf. “Ek dink ek moet hulp soek en my reis na herstel begin.” Ons ken nie Peter se van of waar hy vandaan kom nie – die honderde duisende vlugtelinge in Kakuma kom van oor die hele Afrika. Wat ons wel weet, is waarna hy geluister het: Biblica se Reach4Life, wat uitgesaai word op die Kakuma-stasie van TWR Kenia se Sifa FM-netwerk.
’n Antwoord geanker in die Bybel
“Wat Reach4Life doen, is om die uitdagings wat jongmense moet trotseer direk aan te pak, maar met die Bybel as kompas en Bybelse beginsels as anker vir die uitdagings van die lewe,” sê Njoki Chege, uitvoerende direkteur van TWR Kenia. Reach4Life het in 2004 begin as ’n Bybelstudie-kurrikulum van 40 lesse, as reaksie op die MIV-epidemie in Suid-Afrika.
Die Kerk vra vir ’n antwoord
“Dit was in wese die Kerk wat vir ’n Bybelse antwoord op MIV gevra het,” sê Carien Kotze, Biblica se direkteur vir Suider-Afrika sedert 2021. Volgens die National Institutes of Health het hierdie krisis tussen 2000 en 2005 tot 330 000 voortydige sterftes in Suid-Afrika gelei.
Die skuif na radio
Kotze het ook nuwe moontlikhede in die gesproke woord raakgesien. “Toe ons met Trans World Radio begin praat, het ek vir hulle gesê: ‘Julle is die kundiges. Doen daarmee wat julle wil,’” vertel sy. TWR Kenia het in November 2023 sy ooreenkoms met Biblica onderteken, sê Chege, en die program word nou op al ses Sifa FM-stasies uitgesaai.
Kiswahili skep dieper verbinding
Die program is oorspronklik in Engels opgeneem, maar die vertaling van die draaiboek in Kiswahili is in 2025 voltooi. Volgens Chege het hierdie weergawe ’n groter impak gehad. “Die meeste van ons luisteraars identifiseer sterker met Kiswahili en die stasies wat die program uitsaai gebruik hoofsaaklik daardie taal,” verduidelik sy. “Ons het die Kiswahili-weergawe bekendgestel nadat luisteraars se terugvoer gewys het dat baie verkies om die reeks in Kiswahili te volg, omdat dit vir hulle makliker is om dit te verstaan en ’n sterker verbintenis daarmee te ervaar.”
Dissipelskap wat evangelisasie aanwakker
In Suider-Afrika word die Engelse program tans oor drie radiostasies in vyf lande uitgesaai – Eswatini, Suid-Afrika, Zambië, Malawi en Mosambiek – met groeiende belangstelling. Volgens Victor Kaonga, TWR se internasionale direkteur vir Oos- en Suider-Afrika, word dit ook in Portugees en isiZulu aangebied. Reach4Life is oorspronklik ontwikkel as ’n dissipelskapprogram, sê Kotze, maar dit het ook ’n kragtige hulpmiddel vir evangelisasie geword. Opnames toon dat 87% van deelnemers wat hulle geleer het met familie en vriende gedeel het.
Ontmoet jongmense waar hulle is
Evangelisasie speel beslis ook ’n rol in Kenia, sê Chege. Hoewel Kenia hoofsaaklik ’n Christelike land is, saai die Sifa-stasies in gebiede uit waar die bevolking hoofsaaklik Moslem is, soos die Lamu-argipel. “Ons praat met ’n meerderheid jongmense wat Christus en die Christelike geloof vir die eerste keer ontmoet,” sê sy.
Jeug onder druk
Tog staan Kenia se jongmense voor baie uitdagings, sê Chege. Dit sluit teleurstelling in die lewe en in instellings “wat hulle eintlik behoort te beskerm” in, asook depressie, angs en die gebruik van alkohol en dwelms. Daar is ook die invloed van sosiale media: Kenia het reeds vinnige internet, maklik toeganklike WiFi en bekostigbare selfone en die regering wil WiFi vir almal gratis maak. “Dit maak dat slimfoonverslawing al hoe meer voorkom,” sê Chege.
Waarheid in digitale ruimtes
TikTok is veral gewild in Kenia, waar jongmense dit as ’n soekenjin gebruik vir vrae oor die lewe en geestesgesondheid. Daarom bevorder TWR Kenia Reach4Life op TikTok en ander sosialemedia-platforms. “Ons moet Reach4Life baie duidelik, baie openlik en sonder verskoning in daardie ruimtes plaas – reg voor hulle – om vir hulle die waarheid oor die lewe en oor Jesus te gee,” sê Chege. “Want daar is mense daar buite wat doelbewus jongmense met skadelike inhoud voed.”
Mosambiek, Zambië en Malawi
In Mosambiek is die program aanvanklik in Engels uitgesaai, maar dit word nou in Mosambiekse Portugees aangebied. Die boodskap wat sy op Reach4Life gehoor het, het, het haar laat dink “oor die gevolge van meningsverskille in ons families,” sê Mariana van Maputo. “Dit kan selfs rou veroorsaak en wraak aanmoedig. Maar dit is goed om te sien dat alles in Christus opgelos kan word.”
Wanneer terugvoer baie persoonlik raak
Die grootste uitsaai-gehoor vir Reach4Life is in Zambië, waar One Love FM tot vier miljoen mense bereik en in Malawi waar TWR Malawi ’n gehoor van ses miljoen mense het. Die terugvoer van luisteraars is aangrypend. “Dit was moeilik om groot te word sonder ’n pa, wat my ma en my verlaat het,” skryf Sonfwa van Zambië. “Maar vandag se boodskap uit Lukas 15 het my hart oopgemaak om God as my Vader te ken. Ek wens ek het hierdie boodskap vroeër in my lewe gehoor, maar ek is dankbaar dat ek besef het daar is ’n liefdevolle Vader in die hemel wat vir my omgee.
Hierdie artikel verskyn in die Mei 2026 uitgawe van JUIG! Tydskrif. Lees die digitale weergawe van hierdie tydskrif hier: joygifts.co.za
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Fotos verkry deur oorspronklike artikel
Datum gepubliseer: 22/04/2026
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
