Artikelbron: cvandaag.nl
Guinee-Bissau se bevolking bestaan uit ongeveer 70% Moslems, slegs 11,7% is Christene. Tog het tienduisende mense hul lewens aan Jesus oorgegee tydens ’n groot evangelisasieveldtog van evangelis Jacob Ebershole. Selfs die Islamitiese president het sy deel gedoen om te verseker dat die vergaderings glad verloop. Hy het ook self een besoek.
Dit is merkwaardig omdat die Islamitiese wet voorskryf dat ’n Moslem gedood moet word as hy hom tot die Christendom bekeer. Die president het egter persoonlik verseker dat beamptes alle mense betrokke by die World Harvest Crusade toelaat om die land ongehinderd binne te kom.
Guinee-Bissau bly een van die lande wat die minste bereik is met die Evangelie. Die Christene daar neem hul taak om die goeie nuus te versprei, baie ernstig op. Volgens CBN News het duisende tieners tydens een van die byeenkomste besluit om die strate in te vaar om te evangeliseer. Hulle het ook aanbiddingsliedere gesing wat in die stad gehoor kon word. CBN noem dit verskynsels van “Bybelse proporsies” en vergelyk dit met die herlewing in Asbury, Amerika, aan die begin van vanjaar.
Evangelis Jacob Ebershole is beïndruk deur die geestelike honger wat hy teëgekom het. “Mense het van heinde en verre na die vergaderings gekom. Sommige het selfs gevaarlike waters met kano’s aangedurf om teenwoordig te wees. Ek is steeds beïndruk deur wat gebeur het en dit hou nie op nie. God skryf sy storie.”
In totaal was daar 18 477 geregistreerde bekerings tydens die byeenkomste en nog duisende mense het elke dag tydens straatevangelisasie hul lewens aan Jesus gegee.
Dit is ook besonders dat honderde jongmense die beweging na die volgende stad gevolg het, ondanks die feit dat hulle hulself nie hiervoor voorberei het wat verblyf en klere betref nie. “’n Sakeman het vir my gesê dat niemand by die volgende stad sou opdaag nie, want volgens hom bestaan Gabu uit byna honderd persent Moslems en dit was ook tydens Ramadan. Dieselfde man was geskok toe hy aan die einde van die aand sien hoe honderde Moslems hul lewens vir Jesus gee,” het Ebershole gesê.
Die World Harvest-veldtog het toe voortgegaan na Zambië, waar meer as 200 000 mense ’n byeenkoms in Lusaka bygewoon het. Meer as 45 000 bekerings is daar geregistreer. Mense het ook hul bottels drank, dwelms, afgode en toorgoed te voorskyn gebring. Dié is in groot dromme gesit en aan die brand gesteek. Dit herinner aan Handelinge 19: 18-20: “En baie van die wat gelowig geword het, het belydenis kom doen en hulle dade bekend gemaak; en verskeie van die wat met towery omgegaan het, het die boeke bymekaargebring en voor almal verbrand; en hulle het die waarde daarvan bereken en gevind dat dit vyftigduisend silwerstukke was. So het die woord van die Here met krag gegroei en sterk geword.”
Die veldtog het ook die Peruaanse hoofstad, Lima, besoek. Daar is die byeenkoms in een van die donkerste en gewelddadigste woonbuurte in die stad gehou. Sowat 20 000 mense het dit bygewoon en volgens die organiseerders het meer as 3 000 mense hul lewens aan Jesus gegee.
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
Datum gepubliseer: 14/09/2023
Foto: cfan.org
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
