Artikelbron: opendoorscanada.org
’n Baptiste-pastoor van Mianmar is tot ses jaar tronkstraf gevonnis. Hy word aangekla van terrorisme, onwettige byeenkomsteen die aanhitsing van weerstand teen die regering. Eerwaarde Hkalam Samson, die voormalige voorsitter van die Kachin Baptiste-konvensie, is Vrydag, 7 April, deur ’n hof gevonnis.
Die 65-jarige pastoor is nie toegelaat om sy gesin te sien nie, behalwe toe sy vrou Zung Nyaw, tydens die verhoor op die getuiebank verskyn het. Sy het aan die New York Times gesê dat haar man 24 dae lank aan harde polisie-ondervragings onderwerp is. Hulle dogter Hkalam Hparat Hkawn het bygevoeg dat die vonnis van ses jaar buitensporig is. “Nou bedreig hulle nie net ons vryheid van uitdrukking nie, maar ons is selfs bang om asem te haal.”
Pastoor Samson is op 4 Desember by die lughawe in hegtenis geneem terwyl hy op pad was na die Thaise hoofstad Bangkok vir mediese behandeling. Hy is beskuldig van “terrorisme” en “onwettige byeenkomste” met leiers van ’n etniese militante groep en ministers van die tussentydse regering in ballingskap. Dit was egter ’n gebedsbyeenkoms waarin hy die Bybel aangehaal het, volgens die New York Times, maar die regering het daardie vergadering gebruik om hom van aanhitsing te beskuldig.
Zung het die bewerings ontken en gesê dat haar man die openbare belang wou dien. “Hy is ’n man wat God ken en liefhet. Hy is ’n prediker en het geen vyande nie. Hy is iemand wat homself opoffer en ander help,” het sy aan die Amerikaanse koerant gesê.
Sedert die magsoorname deur die weermag in Februarie 2021, het die Mianmese junta op joernaliste en aktiviste se prokureurs asook politici toegeslaan om hulle stil te maak. Daar is ongeveer 4,4 miljoen Christene wat in Mianmar woon (bevolking 55 miljoen).
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
Datum gepubliseer: 19/04/2023
Foto slegs ter illustrasie. Kunswerke aangepas uit: unsplash.com
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
