Geskryf deur: Gillian Fraser
Artikelbron: JOY! Magazine
Siya Kolisi is welbekend in Suid-Afrika vir sy ongelooflike rugbyvaardighede en omdat hy die eerste swart man is wat die Springbokke aanvoer. Hy is geliefd vir sy passie vir die sport, tog is dit sy passie vir Jesus wat meer indrukwekkend is! Kolisi is uitgesproke oor sy geloof en lei die Bokke deur sy krag uit die Woord van God te put. Ek het die voorreg gehad om met hom te gesels oor sy verhouding met Christus.
Kolisi se suksesverhaal het begin in die armoedige township van Zwide in Port Elizabeth, waar Hy grootgeword het. Hy het moeilike kinderjare gehad en is deur sy ouma, tante en oom in hul beknopte huisie in die nedersetting grootgemaak. Sy ouma was ’n Christen en het hul gesin van kleins af elke Sondag kerk toe geneem. Sy pa het in Kaapstad gewoon en sy ma was te jonk om hom groot te maak.
Moeilike begin
Kolisi het genoem dat hulle nie baie gehad het terwyl hy grootgeword het nie; ’n vol bord kos was iets seldsaam. Hy het nie speelgoed gehad nie, hy het nie ’n behoorlike bed gehad nie, maar hy het dankbaar grootgeword. “Ek onthou net dat ek altyd blydskap in my lewe gehad het,” het hy in ’n onderhoud met Mens Health gesê. “Ek het nie veel gehad nie, maar wat ek gehad het, het die wêreld vir my beteken.”
Sy ouma was sy rots en hy was hartseer toe sy oorlede is. “Sy was alles vir my: Sy was my ouer, my beste vriend,” sê hy. Hy was by die huis toe sy in die kombuis inmekaargesak en in sy arms gesterf het. Hy onthou dat hy na buite gehardloop het en om hulp geroep het en in die laaste oomblikke van sy kinderlike onskuld gevra het: “Is sy dood?” “Maar ek is bly ek was daar, dat sy nie alleen gesterf het nie,” sê hy. “Ek wens altyd sy was nou hier om te sien wat ek van myself gemaak het. Ek wens ek kon haar beloon vir wat sy vir my gegee het. Vir die raad, die inspirasie; vir al die dae wat sy my voor haarself geplaas het en gely het sodat ek kon word wie ek moes wees.”
’n Gesinsman
Kolisi moes vinniger grootword as wat gepas is vir enige kind, maar hy het die waarde van die gesin daardeur geleer. Sy ma is oorlede toe hy ’n tiener was en sy het twee jong kinders agtergelaat – sy halfbroers en -suster – wat hy toe nog nie ontmoet het nie. Hulle het intussen vyf jaar in weeshuise en pleegsorg deurgebring. Kolisi het egter ’n begeerte gehad om die gesin te verenig en het telkens wanneer die rugbyseisoen verby is, na PE gereis om na hulle te soek. Hy het die township deursoek en uitgebreide familie en mense wat hom moontlik kon help, uitgevra. Hy het egter altyd met leë hande na Kaapstad teruggekeer. In hierdie tydstip in sy lewe het Kolisi van God weggedryf en die kerk verlaat.
’n Wonderlike ontdekking
In 2014 het Kolisi daarin geslaag om vir Liyema en Liphello op te spoor en het hulle dadelik liefgekry. Hy was self maar net 23, met sy hele rugbyloopbaan nog voor hom, maar hy kon hulle nie agterlaat nie. Hy het hulle amptelike voog geword en hulle saam met hom na Kaapstad teruggebring. Hulle woon nou saam met Siya en sy vrou, Rachel, en hulle twee kinders, Nicholas en Keziah.
Inspirerende rugbyloopbaan
Omdat hy in ’n township in Suid-Afrika grootgeword het, het Kolisi nie altyd toegang tot die beste rugbygeleenthede gehad nie. Hy het hom voorgeneem om sy omstandighede te bowe te kom en meer as ’n statistiek te word. Sy deursettingsvermoë en dryfkrag het verseker dat hy bo die res uitstaan en van kleins af het sy vaardighede op die veld rugby-agente beïndruk. Kolisi is op 12-jarige ouderdom ’n beurs by Grey Junior School aangebied en het daarna in sy tienerjare by dieselfde hoërskool ingeskryf, waar hy sy fokus op rugby behou het en by die eerste span aangesluit het.
Loopbaanhoogtepunte
Sy rugbyloopbaan het van krag tot krag gegaan, totdat hy in Februarie 2017 as kaptein van die Springbok-rugbyspan aangewys is, ’n stap wat Bryan Habana geloof het as, “’n Monumentale oomblik vir Suid-Afrikaanse rugby en in die Suid-Afrikaanse geskiedenis.” In gesprek met SA Rugby het Kolisi gesê: “Wie jy ook al is, wat ook al jou kleur of jou situasie, jou verlede bepaal nie jou toekoms nie. As jy aanhou deurdruk vir wat jy wil hê, sal jy dit kry. Dit geld vir die lewe sowel as in sport. Daar gaan moeilike tye wees, maar jy moet daardie uitdagings gebruik om jou vorentoe te dryf.”
Nader aan God
In 2015, drie weke ná die Wêreldbeker-sokkertoernooi, het Kolisi geluister na die Here se roepstem in sy hart. Hy het vertel hoe hy ver van God af weggedryf het, maar ook hoe hy en sy vrou saam gesit en praat het oor hoe hulle Hom in hul lewens nodig het. Hulle het ’n besluit geneem om kerk te begin bywoon en het by Hillsong Century City aangesluit. Kolisi het baie tyd saam met pastoor Phil Dooley deurgebring, wat hom gementor het in sy wandel met Christus. Kolisi se lewe was daarna nooit weer dieselfde nie en hy en sy vrou is nou aan die brand vir Jesus.
VRAAG-EN-ANTWOORD-SESSIE
Dit is moeilik om jou getuienis in die rugbywêreld uit te leef, ’n mens word aan baie versoekings blootgestel. Hoe bly jy sterk staan in jou geloof en jou wandel met God?
Die versoekings is ’n werklikheid, soms sukkel ons almal en maak foute. Die beste is om jouself altyd met Christene te omring – daar is baie van hulle in die span. Hulle sal jou aanmoedig, jou opbou en jou altyd aanspreeklik hou. Ons het Bybelstudies as ’n span en bid dikwels saam. Ek probeer ook om die Woord soveel moontlik te lees wanneer ek alleen is, elke liewe aand voor slaaptyd.
Rugby is ’n uiters mededingende sport waar wen of verloor jou selfbeeld kan toets. Hoe verwerk jy dit?
Ek sê altyd vir my spanmaats dat ’n mens se talente van God af kom. Ons moet altyd nederig bly. Dit is ’n groot seën om te weet dat, ongeag wat, niks God se wil kan troef nie – Sy wil sal altyd geskied. Ek moedig my spanmaats aan om altyd hul beste te gee tydens die oefensessies, om hulle alles te gee. Ek vra ook altyd die Here om my te gebruik. Ek het dit alles in Sy hande geplaas. Die wete dat Hy in beheer is, gee my vrede. Dit is belangrik om te weet waar jou waarde lê, om te weet wie jy in Christus is.
Hoe het jou spel verander sedert jy kaptein geword het?
Ek dra heelwat meer verantwoordelikheid op my skouers. My spel het aanvanklik effens agteruitgegaan, maar namate ek begin ontspan het in die rol, het dit het net al hoe beter geword. Ek werk harder as ooit tevore en ek gee my alles.
Hoe groei julle in jul geloofswandel as ’n gesin?
Ek is baie weg van die huis af, wat roetine moeiliker maak. Rachel is ’n wonderlike ma en het ’n wonderlike ondersteuningsgroep van die kerk. Ons gaan elke Sondag kerk toe as ek by die huis is en sy neem die gesin elke Sondag kerk toe as ek nie daar is nie. Rachel maak seker dat sy vir ons almal ’n voorbeeld stel en moedig ons daagliks aan om die Woord te lees en op God te steun.
Alle dinge deur Christus
Siya Kolisi getuig openlik oor sy geloof en steun op die Skrif om hom deur die moeilike tye te dra, op en van die veld af. Hou hierdie man van God in jou gebede terwyl hy Christus se lig in Suid-Afrika skyn. Bid vir sy krag, vir sy geloof, vir sy gesin en vir sy toewyding om Jesus altyd te eer en Hom eerste te soek.
Hierdie onderhoud is in Januarie 2019 in JOY! Magazine gepubliseer.
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Datum gepubliseer: 02/11/2023
Fotograaf: Waldo Swiegers / SA Rugby
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
