Geskryf deur Greg Laurie
Artikel bron: Harbinger’s Daily
Daar was ’n tyd toe mense voortdurend blootgestel is aan ’n eensydige beeld van God as ’n kwaai Godheid wat gereed staan om mense in die vure van die hel te werp. Mense het gekla oor te veel “hel-en-verdoemenis”-prediking.
Maar wanneer laas het iemand nog so ’n boodskap gehoor? Ongelukkig sou Jonathan Edwards se beroemde preek Sinners in the Hands of an Angry God, wat hy in 1741 gelewer het, waarskynlik vandag nie in baie kerke toegelaat word nie.
Baie mense het nou weer te ver in die teenoorgestelde rigting beweeg en leer dat God bloot ’n liefdevolle, vriendelike Opperwese is wat skynbaar geen mening het oor hoe ons leef nie. Die aanname is dat solank ons net “getrou aan onsself” bly, alles reg is met Hom. Hy aanvaar ons net soos ons is.
Ons hou van God se eienskappe soos liefde, vergifnis en deernis, asook die wonderlike bonus van die ewige lewe in die hemel. Aan die ander kant skrik mense terug vir ’n heilige God wat ons innig liefhet, maar ook bekering sowel as geloof vereis – ’n God wat belowe om dié te oordeel wat weier om op Sy voorwaardes na Hom te kom.
Ander sien God weer as ’n soort heidense godheid wat net tevrede gehou moet word. Hulle dink dat, as hulle godsdienstige rituele nakom, hulle hul deel gedoen het en dan as’t ware krediet opgebou het om die res van die week te sondig. Mense kan so ’n god volg soos hulle wil. Maar dit is nie die God van die Bybel nie.
Wanneer ons begin kies watter dinge oor God vir ons aanvaarbaar is en watter nie, verklein ons nie net ons begrip van wie God werklik is nie, maar glo en verkondig ons ook ’n valse evangelie.
Sommige predikers bring vandag swak, afgewaterde boodskappe in die naam van die evangelie. Hulle sê vir mense om te glo, maar praat nie van bekering nie. Hulle praat van die hemel, maar nie van die hel nie. Hulle praat van vergifnis, maar nie van berou nie.
As hierdie dinge ontbreek, is dit nie meer die Evangelie nie. Ons kan nie die Evangelie verander volgens wat vir ons aanvaarbaar is of nie. Ons moet dit verkondig soos God dit gegee het. Anders beroof ons die Evangelie van sy krag en doeltreffendheid.
Ons kan nie beheer wat in die wêreld gebeur nie. Maar terselfdertyd kan ons nie toelaat dat ’n sekulêre samelewing se denke bepaal hoe ons glo nie. Die doel is nie om by die wêreld se manier van dink aan te pas nie. Dit is nie om die Bybel by die kultuur aan te pas nie.
Wanneer ons desperaat probeer om almal gelukkig te hou en niemand aanstoot te gee nie, sal ons uiteindelik geen werklike impak op die kultuur hê nie.
Wanneer ons begin peuter aan die kernwaarhede van ons geloof – soos die Bybel, die Evangelie en die natuur van God self – skep ons vir onsself ’n ander beeld van God.
Die God van die Bybel het ons inderdaad lief en aanvaar ons soos ons is. Maar die God van die Bybel wil ons ook verander. Hy wil ons al meer gelykvormig maak aan die beeld van Jesus Christus.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Hoof foto verkry deur oorspronklike artikel gepubliseer Harbinger’s Daily
Datum gepubliseer: 27/05/2026
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
