Mense wat saam hoop skep! Werkgewer en huishulp word vennote in hul eie besigheid

Geskryf deur: Thislife Online tydskrif
Artikelbron: www.thislifeonline.co.za 

Almal kan doen met ’n helpende hand in die lewe, nie waar nie? Veral in ons geliefde Suid-Afrika. Wees dus geïnspireer deur hoe twee Kaapse werkgewers wat jare lank gesteun het op hulle huishulpe se helpende hand, nou ook hulle hand in vennootskap geneem het om saam besighede te begin!

MONIEK EN NONZUZO
Moniek en Nonzuzo, gelyke vennote in besigheid. “Oral in Suid-Afrika weet vroue soos Nonzuzo dinge van ons wat selfs ons beste vriende nie weet nie, maar hulle word nie altyd as individue ‘gesien’ nie,” sê Moniek

MONIEK SE STORIE

Moniek de Rooy (45) is ’n skoonheidsterapeut/kunstenaar/eiendomsbestuurder en ma van drie tienerkinders. Sy is getroud met entrepreneur John en hulle woon in Kaapstad se Melkbosstrand

‘Nonzuzo het haar die afgelope 12 jaar daaraan gewy om ons huis en kinders te versorg. Sy het my kinders saam met my grootgemaak en ’n vriendin geword. Ons het mekaar se laste gedra en saam vir ons gesinne gebid. Haar voorkoms is onberispelik, maar haar werkklere het nie haar waardigheid of haar skoonheid weerspieël nie. Die uniforms wat ek vir haar gekoop het, het gou verblyk, onder die arms geskeur en die knope het keer op keer afgebreek.

Maar dit was eers toe ek vir Nonzuzo gevra het hoe sy oor haar uniform voel dat ek besef het hoe ongemaklik sy werklik daarin voel. My oë het oopgegaan vir ’n aspek van haar wêreld wat ek nog nooit vantevore oorweeg het nie toe sy verduidelik dat die uniform haar minderwaardig laat voel omdat dit haar herinner aan wat haar ma en ouma tydens die apartheidsera gedra het toe hulle ‘bediendes’ genoem is.

Ek het haar gevra wat sy sou verkies om te dra wanneer sy werk. Sy het genoem dat sy ’n eenvoudige slooprok sou wou dra wat gemaklik sit, maklik is om in te werk en meer soos sy gevoel het – iemand vol lewensvreugde. “Iemand moet iets hieraan doen,” het ek gedink. Daarom het ons saam ’n besigheid begin!

Ek het geen ondervinding in klereproduksie nie, maar Nonzuzo het my ’n paar idees gegee en ek het dit gebruik om beter werksdrag te skep. Byvoorbeeld, ’n voorskoot met ’n klein sakkie vir ’n selfoon, ’n groter sak vir ’n maklik-toeganklike lap en die rok is uit 100% katoenstof gemaak wat ’n mens se vel laat asemhaal. Om die rokke te maak, moes ons die vervaardigingsproses uitkontrakteer, wat ’n aantal uitdagings veroorsaak het, maar ons het volhard omdat ons in ons missie glo.

Die reaksie was fenomenaal. Ons eerste bestellings was van vriende van my wat dit vir hul huiswerkers bestel het, van wie een ons rok aangetrek en gesê het: ‘I feel like a million dollars!’ Dan en wan sal iemand na my kyk asof hy/sy wil sê: “Hoekom sou Ek wil dit doen?” maar die algemene reaksie is dat die uniforms spesiaal is. Ons is nog onervare, wanneer ons dus nie weet watter tree om volgende te neem nie, bid ons oor dinge. Ek glo eerlikwaar dat God ons lei.

Moniek: “Ons wil hierdie wonderlike eer wat ons inspireer en hulle laat weet dat ons hulle sien en waardeer.” | Foto: Leentjie du Preez

Ons het ons besigheid Nontle genoem, wat ‘Moeder van Skoonheid’ beteken, om die wonderlike vroue wat ons inspireer te eer en hulle te laat weet dat hulle gesien en waardeer word. Ons is gelyke vennote daarin. Nonzuzo is regtig goed met verkope en die opvolgwerk en leer meer met elke interaksie. Sy kan nie bekostig om in die besigheid te belê nie, dus is my man die belegger. Sodra ons die belegging afbetaal en begin geld maak, sal ons die winste 50/50 deel. Nie een van ons kry tans ’n salaris nie.

Hierdie besigheid gaan oor soveel meer as om gemaklike werksdrag te skep. Ons wil persepsies verander. Regoor die land verrig vroue soos sy so ’n belangrike taak, sorg vir ons huise en kyk dikwels na ons kosbaarste besitting, ons kinders! Hulle is intiem betrokke by ons lewens en weet dinge van ons wat selfs ons beste vriende nie weet nie, maar hulle word nie altyd as individue ‘gesien’ nie.

Foto: Leentjie du Preez

Ek en Nonzuzo wil op ons eie manier huishulpe help om hulself in ’n nuwe lig te sien en mense aanmoedig om hul rol meer te waardeer. Ek glo elke vrou maak saak, elke vrou is God se dogter, en wie sy binne is raak die lewens van ander.’

NONZUZO SE STORIE

Nonzuzo met die vrolike uniformreeks wat sy in samewerking met Moniek bekendgestel het: ‘Die manier waarop jy jouself sien is belangrik,’ sê sy. ‘Vir my en my vriende gaan die ou apartheidstyl-uniform met vernedering gepaard’ | Foto: Leentjie du Preez

Moniek se sakevennoot, Nonzuzo Nkqayana (35), is ’n huishulp sedert sy skool verlaat het. Sy is getroud met Bongani, wat in plastiekproduksie werk, en hulle woon saam met hul drie jong kinders in die Khayelitsha-township

“Ek is bly om ‘n huishulp te wees, want ek is ’n vrou wat in diens is en kos op die tafel kan sit vir my kinders. Alhoewel ek en my vriende ons uniforms uit respek dra, hou ons egter nie daarvan om dit in die openbaar te dra nie. Vir ons gaan die ou apartheidstyl-uniform met vernedering gepaard en ons voel skaam wanneer ons dit in die openbaar moet dra. Die manier waarop jy jouself sien, is belangrik. Dit het dus so wonderlik gevoel toe Moniek my vra wat ek oor my uniform voel en positief gereageer het op wat ek vir haar gesê het.

In hierdie stadium is ons besigheid nog klein, dus gaan ek voltyds aan met my huiswerk en doen die bemarking en verkoopswerk oor die naweek en in my etensuur. Ek kry bestellings van sosiale media en deur met mense te gesels wat dan hul werkgewers van die rokke vertel. Ons het onlangs na Kamers-mark in Stellenbosch gegaan en ’n aantal bestellings gekry, insluitend ’n paar kontakte van klein besighede en boetiekhotelle wat hul name op die uniform wil hê.

Moniek en Nonzuzo by die Nontle-stalletjie by die Kamers-mark in Stellenbosch

Ek en Moniek hoop om huishulpe te help om selfversekerd en bemagtig te voel en te besef dat hul werk belangrik is. Ons hoop ook dat ander mense waardige vroue sal sien wat ’n inkomste vir hul gesinne verdien. Ons draai elke rok in sneespapier toe en sluit ’n persoonlike nota in wat sê: ‘You are loved and honoured and respected as a home executive. Always walk with confidence, woman of beauty’.

Foto: Leentjie du Preez

 Ons is nie ervare nie, so ons vra God se hulp in elke stadium. Ek voel Hy sal deure vir ons oopmaak, vir die dinge wat ons veronderstel is te doen. Ons albei weet ons het baie om te leer, maar ons is opgewonde oor die reis wat voorlê en trots om die skoonheid en krag van vroue soos ek te vier. Om die sakewêreld te betree is iets waarvan ek nooit eers sou gedroom het nie! Ek voel elke dag dankbaar vir hierdie geleentheid.’

HOE KAN JY NONZUZO EN MONIEK ONDERSTEUN?
Volg Nontle op Instagram Facebook. Om hul rokke te bestel, besoek nontle.co.za of e-pos hello@nontle.co.za

Beide Moniek en Nonzuzo praat graag by enige klein byeenkoms of vrouegeleentheid

Klik hier om OP HOOGTE van die nuus te bly deur op ons GRATIS weeklikse nuusbrief in te teken.

Datum gepubliseer: 25/01/2024
Foto’s: This Life Online Magazine, Lientjie du Preez

VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.