Geskryf deur Rachel Kalidass
Artikel verskaf deur Prayer & Repentance
Oorspronklik gepubliseer deur JUIG! Tydskrif Junie 2026
Dit is geen geheim dat baie Suid-Afrikaners moeg is nie. Die teleurstellings was werklik. Beloftes is gemaak en verbreek, gemeenskappe wag steeds vir water en elektrisiteit en ’n generasie jong mense wonder of daar enigsins ’n toekoms vir hulle is. As jy hierdie frustrasie ervaar het, is jy nie alleen nie.
Hoop roep ons vorentoe
Tog bly ons steeds staande. Ons glo nog. Ons bid nog. Dit is die veerkragtigheid wat die Suid-Afrikaanse Kerk nog altyd gedra het en dit is ’n gawe. Maar geloof sonder dade is onvolledig, en op hierdie oomblik is een van die mees praktiese maniere om jou geloof uit te leef juis iets wat maklik afgeskeep word: om te gaan stem. “’n Volk juig as regverdige mense die mag kry; ’n volk sug as ’n goddelose mens regeer” (Spr 29:2).
Waarom party van ons teruggestaan het en hoekom dit verstaanbaar is
Baie gelowiges het dit stilweg aanvaar om weg te bly van die stembus. Party voel politiek is te vuil, te verdelend en te ver van God se dinge af. Ander het al voorheen gestem – met hoop en opregtheid – en is teleurgestel. Daardie pyn is werklik.
Maar om terug te tree is nie neutraal nie. Wanneer die Kerk terugstaan, bly die ruimte wat ons laat nie leeg nie. Iemand anders vul dit – en die besluite wat daar geneem word, raak ons gesinne, ons kerke, ons besighede, ons water en ons strate.
Sout en lig is nie passief nie
Jesus het sy volgelinge as sout en lig beskryf (Matt 5:13-16). Sout bewaar nie as dit net in die soutpot bly nie. Lig verdryf nie die donker as dit weggesteek is nie. Albei vra dat ons teenwoordig moet wees – daar waar dinge gebeur, ook binne die stelsels en strukture wat die alledaagse lewe raak. In Jeremia 29:7 roep die Here sy volk, selfs in ballingskap, om hulle te beywer vir die welvaart van die stad. Nie net om van ’n afstand te bid nie, maar om doelbewus by te dra tot sy voorspoed. Suid-Afrika, en die stede daarin, is ons land. Sy vrede en voorspoed is deel van ons roeping. “Bevorder die belange van die stad waarheen Ek julle in ballingskap weggevoer het, bid tot My vir daardie stad, want sy belange is ook julle belange” (Jer 29:7).
Om te stem is nie net politiek nie – dit is rentmeesterskap
Dit is nie ’n oproep om jou hoop op enige politieke party te plaas nie. Ons hoop bly in God, nie in die regering nie. Maar rentmeesterskap beteken om elke hulpmiddel wat in ons hand geplaas is, wys te gebruik – en in ’n demokrasie is ’n stem een van daardie hulpmiddels. In 1 Timoteus 2:1-2 moedig Paulus ons aan om vir die owerhede te bid, sodat ons ’n rustige en godvresende lewe kan lei. Gebed en optrede hoort bymekaar. Ons bid, maar ons tree ook op. Romeine 12:2 roep ons om nie soos hierdie wêreld te word nie, maar om nuut te dink – en dan met daardie nuwe perspektief in die wêreld in te tree. Nie om te onttrek nie, maar om betrokke te wees.
Die plaaslike verkiesing is nader as wat jy dink
Suid-Afrika se plaaslike regeringsverkiesing in 2026 gaan oor die leiers wat die naaste aan jou daaglikse lewe staan – die paaie rondom jou kerk en in jou buurt, die water in jou krane, die ligte in jou strate, die parke waarin jou kinders speel en die netheid van jou omgewing. Hierdie verkiesing is nie ver of vaag nie. Dit is plaaslik. Persoonlik. En dit het jou stem nodig.
Vir ’n tyd soos hierdie
Mordegai se woorde aan Ester dra steeds gewig: “Wie weet, miskien is dit juis met die oog op ’n tyd soos hierdie dat jy koningin geword het” (Est 4:14). Ester het nie gevra om in daardie posisie te wees nie, maar sy was daar en sy moes kies.
’n Oomblik om op te tree
Jy is hier – in hierdie land, in hierdie tyd,
met ’n stem in jou hand. Dit is nie toevallig nie. Dit is ’n geleentheid. Suid-Afrika het gelowiges nodig wat opdaag – nie net in kerkbanke nie, maar by stemlokale. Nie as partydiges nie, maar as mense met ’n gewete. Nie met woede of wanhoop nie, maar met ’n stille, vasberade hoop wat vloei uit vertroue in ’n God wat deur eenvoudige dade van getrouheid werk. Registreer. Bid. Daag op. Stem. Want wanneer God se mense doelgerig opstaan, kan nasies verander.
DIE NAWEEK VAN 1-2 AUGUSTUS 2026 IS DIE LAASTE KANS OM TE REGISTREER!
Hierdie artikel verskyn in die Junie 2026 uitgawe van JUIG! Tydskrif. Lees die digitale weergawe van hierdie tydskrif hier: joygifts.co.za
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Fotos verkry deur oorspronklike artikel gepubliseer in die JUIG! Tydskrif; Junie 2026
Datum gepubliseer: 20/05/2026
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
