Geskryf deur: Errol Naidoo Artikelbron: www.familypolicyinstitute.com
Die 2024 algemene verkiesing beloof om die grootste invloed te hê sedert die koms van Suid-Afrika se demokrasie in 1994. Die geboorte van die nasie se nuwe demokratiese bedeling het groot belofte ingehou. Tragies genoeg blyk dit egter dat die regerende ANC sy verklaarde visie, om die nuwe demokratiese Suid-Afrika in die beste belang van burgers te regeer – ongeag etnisiteit, laat vaar het.
Sedert die Zuma-administrasie het die land ’n versnelde politieke en ekonomiese agteruitgang beleef. Algehele korrupsie het byna elke sektor van die samelewing vernietig. Die ANC se verval in volslae kriminaliteit het ’n potensieel kragtige ekonomiese rolspeler in ’n mislukte staat verander.
Die meeste politieke ontleders is dit eens dat Suid-Afrika heel waarskynlik nie nog vyf jaar van die ANC se onbevoegdheid, onbeteuelde korrupsie, bedrog, diefstal en geldwassery sal oorleef nie. Kortom, burgers moet die kollektiewe besluit neem om die land terug te neem van die kriminele netwerke wat dit vernietig.
Die algemene verkiesing in 2024 sal anders wees as die vorige demokratiese verkiesings. Onafhanklike kandidate sal vir die eerste keer saam met politieke partye aan die algemene verkiesing deelneem. Dit is betekenisvol dat die onlangs uitgevaardigde “Verkiesingswet” ’n oortuigende uitdaging van die Independent Candidates Association (ICA) voor die konstitusionele hof in die gesig staar. (Die ICA het die aanvanklike hofsaak gewen.)
Die ANC het sy parlementêre meerderheid gebruik om die “Verkiesingswet” te wysig om homself te bevoordeel. Die gewysigde Kieswet sal egter nie grondwetlike toets deurstaan nie – wat beteken dat die wetgewing hersien sal moet word om die ware gees van die konstitusionele hof-uitspraak te weerspieël.
Bemoedigend genoeg is daar, afgesien van die ICA se konstitusionele hof-uitdaging verskeie burgerlike inisiatiewe wat kiesers moontlik kan oortuig om weg te breek van tradisionele stempatrone en nuwe politieke kanale te oorweeg.
Die “Time2Rise”-beweging bou landswyd momentum en inspireer burgers om te verenig vir werklike verandering. ’n Groot byeenkoms word van 6 tot 8 Oktober in Bloemfontein beplan waar nasionale leiers – insluitend oudhoofregter Mogoeng, Mogoeng – burgers tot aksie sal mobiliseer.
Die “OneSA”-beweging, onder leiding van Mmusi Maimane, vergroot ook sy nasionale voetspoor. Sy visie om die nasie van politieke, sosiale en ekonomiese agteruitgang te red, vind aanklank by ’n jong en groeiende demografie wat desperaat is vir eerlike, visioenêre en bestendige bestuur.
Dit is egter betekenisvol dat, toe Suid-Afrika voor 1994 deur sekere gevare in die gesig gestaar is, die Kerk, verteenwoordig deur moedige leiers die apartheidstelsel met vrymoedigheid teëgestaan het en die Suid-Afrikaanse mense geïnspireer het om vreedsaam saam te staan vir ’n regverdige samelewing vir almal.
Die land se huidige situasie verskil nie veel nie. Suid-Afrika word onder die korrupte en vernietigende wanbestuur van die ANC-kriminele netwerk weer deur sekere gevare in die gesig gestaar. Ontelbare miljarde belastingbetalersgeld is en word straffeloos geplunder. Ondernemings in staatsbesit en demokratiese instellings is deur korrupte en onbekwame kaders uitgehol en verwoes.
Geen land op aarde kan die verbysterende vlakke van diefstal van openbare fondse onbepaald volhou of die growwe wanbestuur wat Suid-Afrika tans verduur nie. Dié land spog met van die beste sakeleiers ter wêreld in landbou, mynbou, vervaardiging en finansies. Suid-Afrika is ook ‘n toeristemekka met massiewe potensiaal vir groei in hierdie en elke ander sektor.
Tragies genoeg laat die nasie se politieke leierskap hom in die steek. Dit kan en moet verander deur moedige en beslissende burgerlike leierskap – ’n leierskap wat Suid-Afrika desperaat ontbreek.
Godsdienstige en burgerlike leiers het geweet dat Suid-Afrika nie onder die apartheidstelsel kon floreer nie. Dit is hoekom so baie van hulle gewerk het vir verandering ondanks die gevaar dat hulle toegesluit kon word. Hierdie nasie sal nie onder voortgesette ANC-korrupsie en wanbestuur oorleef nie.
Wat leiers moet erken, is dat Suid-Afrika veg vir oorlewing. Die toekoms van 60 miljoen burgers lyk somber en onseker omdat ’n relatief klein groepie misdadigers die nasionale tesourie in ’n persoonlike voerbak vir selfverryking omskep het.
Elke etiese leier wat Suid-Afrika liefhet en opreg vir die welstand van sy mense omgee, moet ‘n dapper en beslissende standpunt inneem vir die toekoms van die nasie. Mense volg leiers. Waar daar geen visie (en beslissende leierskap) is nie, vergaan ’n nasie.
Van nou af moet Christelike en burgerlike leierskap met durf standpunt inneem vir eerlike deursigtige en doeltreffende regering. Die ANC het herhaaldelik sy ampseed aan die burgers verbreek. Dit moet by die stembus verwerp word.
God is in beheer van die lot van nasies. Die Wonderwerk van 1994 wag om in 2024 herhaal te word. Die God wat 1994 moontlik gemaak het, is steeds vir ons. Bid, praat en gaan oor tot aksie vir Suid-Afrika se lot!
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
Datum gepubliseer: 17/08/2023
Foto slegs ter illustrasie. Kunswerke aangepas uit www.rawpixel.com
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
