Geskryf deur: FEBA Radio SA
Artikelbron: JUIG! Tydskrif
‘n FEBA-werker stap in die straat van ’n Malawiese dorpie toe ’n jong seun na haar toe hardloop en sy notaboekie waai. “Kyk, Tannie Gladys, die onderwyser merk my nou reg!” Gladys Mthunya Chitengu is die vrou in beheer van FEBA Malawi se kinderprogramme. Nie te lank gelede nie het hierdie seun haar vertel dat hy nie meer van skool hou nie, omdat hy nie goed vaar nie en sy maats hom daarvoor uitgelag het. “Ek het vir hom gesê dat ons ’n Vader in die hemel het wat ons hoor wanneer ons Hom aanroep… Ek het vir hom gesê om in die klas sy Vader aan te roep om hom te help om te onthou wat die onderwyser hom geleer het.” Nadat sy hierdie storie gedeel het, voeg Gladys by: “Ek is baie bly om te weet dat hy sal grootword met die wete dat daar Iemand is wat elke gebed hoor.”
’n Nasie in nood
Gebed is dringend nodig vir Malawi. Dit is een van die armste lande ter wêreld, geteister deur ’n uitmergelende siklus van droogtes en vloede wat in baie dele tot voedseltekorte gelei het. ’n Beraamde 11% van kinders onder vyf jaar is ondergewig. Malawi is ook ’n jong land, met meer as 37% van die bevolking jonger as 14 jaar oud. Primêre onderwys, wat op sesjarige ouderdom begin en vir agt jaar voortduur, is verpligtend, en leerders moet die Laerskool-eindsertifikaat-eksamen slaag en gekeur word om ’n openbare sekondêre skool by te woon. Die gehalte van onderwys verskil, en meer as 30% van mense ouer as 15 jaar is ongeletterd.
Kindertyd
Gladys het in 2020 by FEBA aangesluit as omroeper en vervaardiger. Sy produseer tans die gewilde Nthawi Ya Ana of Kindertyd-program. Die program is in segmente verdeel om dit opwindend te hou. In die eerste segment stel Gladys die program bekend en in die tweede lees sy ’n Bybelvers en lewer ’n kort, eenvoudige boodskap. Die derde segment bevat gedigte, liedjies en ander aktiwiteite wat Gladys opneem tydens besoeke aan luisteraars se skole. In die laaste segment kan kinders inbel en vrae vra oor die Bybelboodskap of hul vriende op regstreekse radio groet.
Leer nuwe dinge
As ’n onderwyser hou Gladys daarvan om met kinders te werk en voel sy gemaklik met hulle. “Kinders verstaan dinge maklik en is oop om nuwe dinge te leer,” sê sy. “Ek gebruik verskillende maniere om die Evangelie te deel. Wanneer ek hulle in hul dorpe ontmoet, sorg ek dat ek speletjies, liedjies en soms lekkernye saam vat. Ek preek nie die boodskap direk nie, maar gebruik dikwels volksverhale – ons noem dit nthano – of ek maak ’n liedjie oor die les wat ek wil oordra, wat ek dan vir hulle leer, saam met ’n verduideliking van wat die liedjie beteken.”
Vra vir raad
Terwyl die kinders goed leer deur groepsaktiwiteite, deel sommige soms persoonlike probleme met Gladys en vra vir raad. Een van haar luisteraars, ’n jong meisie genaamd Mercy, kom uit ’n huis van ongelowiges. Sy het saam met ’n vriendin een van FEBA Malawi se kinderbyeenkomste bygewoon en besluit sy wil kerk begin bywoon, maar niemand in haar gesin het gegaan nie. Gladys het haar aangemoedig om die volgende Sondag saam met een van haar vriendinne kerk toe te gaan. Sedertdien woon Mercy elke week die kerk by. Sy het haar ma genooi, en nou woon haar ma en broers en susters ook gereeld die kerk by! Mercy se pa het tot dusver geen belangstelling getoon nie, maar Gladys bly steeds hoopvol. “Ek glo God sal hom help ontdek wie Hy is.”
Nuwe planne
Baie dorpskinders woon nie skool by nie as gevolg van afstand of ’n gebrek aan motivering. Gladys bid vir die geleentheid om vroeëkinderontwikkelingsentrums te open waar kinders tussen drie en tien jaar oud skoolopleiding in hul dorpie kan ontvang, sonder dat dit nodig is om twee keer per dag lang afstande te reis. Hierdie sentrums sal vrywilligers aanstel om die kinders te onderrig en hulle ook van die Evangelie te leer.
Landbou-afhanklikheid
Met Malawi se ekonomie wat swaar op landbou steun, word kinders dikwels ingespan om op plase te werk. Volgens ’n onlangse verslag deur die Internasionale Arbeidsorganisasie is sowat 2,1 miljoen Malawiese kinders betrokke by kinderarbeid, terwyl FairPlanet rapporteer dat kinders gereeld na Tanzanië gesmokkel word om te werk. Kinderhuwelike is ook nie ongewoon nie. Sowat 7,5% van vroue is getroud teen die ouderdom van 15 en 37,7% teen die ouderdom van 18.
VAT HANDE MET FEBA
Indien jy ’n skenking vir hierdie lewensveranderende projek wil maak, besoek asseblief ons webtuiste febaradio.co.za of skakel 012 335 5708
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Datum gepubliseer: 2/02/2025
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
