Artikelbron: concernedwomen.org
Die bekende Christelike aktivis Beverly LaHaye is op die ouderdom van 94 oorlede. Sy het in 1979 Concerned Women for America (CWA) gestig in reaksie op die destydse feministiese beweging wat sy geglo het nie die meerderheid Amerikaanse vroue verteenwoordig het nie. Sy was bekend vir haar Christelike sienings oor aborsie, die huwelik en haar steun vir Israel.
Sy word oorleef deur drie kinders (’n vierde kind is in 2017 oorlede), nege kleinkinders en 20 agterkleinkinders.
“Beverly LaHaye is nie in weelde gebore nie en ook nie geseën met buitengewone vaardighede en vermoëns nie. Haar lewe is egter ’n wonderlike demonstrasie van wat God met iemand kan doen wat volkome aan Hom toegewy is. Sy was haar hele lewe lank ’n getroue volgeling van Jesus Christus en Hy het haar op buitengewone maniere gebruik om ’n verskil in die wêreld om haar te maak,” het CWA gesê.
Beverly Jean Ratcliffe is In 1947 met Tim LaHaye getroud terwyl sy nog op universiteit was.
“Mev. LaHaye het opgestaan vir die vergete vroue van hierdie land, wie se stemme nie in Washington en in die kultuur gehoor is nie. Haar lewe is ‘n getuienis van die impak wat een vrou met ‘n visie en missie op die verloop van die geskiedenis kan hê,” het Penny Nance, die uitvoerende hoof van CWA, in ’n verklaring gesê.
LaHaye was ook die skrywer of medeskrywer van verskeie boeke, insluitend The Spirit-Controlled Woman, Understanding Your Child’s Temperament, Who But A Woman? en The Desires of a Woman’s Heart.
LaHaye het ook verskeie toekennings ontvang, insluitend die Religious Freedom-toekenning van die Southern Baptist Convention in 1991, die Thomas Jefferson Award for Servant Leadership van die Council for National Policy in 2001, die Winston Churchill Lifetime Achievement-toekenning van die Faith and Freedom Coalition in 2016 en die Platinum Boek-toekenning van die Evangelical Christian Publishers Association vir die verkope van 1 miljoen eksemplare van haar boek, The New Spirit-Controlled Woman, in 2019.
Haar man, Tim, is in 2016, ná 69 jaar van huwelik, op die ouderdom van 90 oorlede. Tydens sy begrafnis het Beverly LaHaye haar familielede kragtig toegespreek: “Ek is seker dat hy vandag uitsien na al 39 van julle wat eendag by hom in die hemel sal aansluit om die ewigheid in die teenwoordigheid van ons Verlosser deur te bring, wat sy lewe vir elkeen gegee het. Tim sou nie wou hê dat enigeen van julle agtergelaat word nie, en ek sê dit met alle opregtheid.”
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Datum gepubliseer: 17/04/2024
Foto: Beverly LaHaye (Concerned Women for America)
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
