Geskryf deur Gawie de Lange
Artikel oorspronklik geplaas in JUIG! Tydskrif Junie 2026
Met Hemelvaartdag en Pinkster pas agter die rug, keer my hart telkens terug na ’n baie spesiale oomblik tydens ons onlangse JOY! Travel-toer na Israel. Om 42 mense deur die Heilige Land te lei is altyd ’n voorreg, maar hierdie keer het anders gevoel. As gevolg van die oorlog was daar byna geen ander groepe nie en dit het vir ons ’n seldsame geskenk gegee … tyd. Of meer spesifiek, tyd in die bovertrek.
Twee gawes in die bovertrek
In daardie bovertrek is twee dinge aan ons gegee. Eerstens die nagmaal waar Jesus gewys het dat ons deur sy gebroke liggaam en vergiete bloed genesing, vergifnis en toegang tot die Vader ontvang het. Die voorhangsel is geskeur en ons kan Hom nou Abba Vader noem. Tweedens, die uitstorting van die Heilige Gees.
Die Gees woon nou binne-in ons
In die Ou Testament het die Gees op mense gekom vir spesifieke oomblikke – Elia, Simson en Josua is voorbeelde hiervan. Ná Pinkster het alles egter verander. Nou woon Hy binne-in ons. Dieselfde Gees, dieselfde dunamis-krag wat Jesus uit die dood opgewek het, leef binne-in ons.
’n Tasbare ontmoeting
Ons het aanbid en gebid en ek kon ’n volledige boodskap in die bovertrek deel, iets wat nie dikwels op hierdie toere gebeur nie. Wat gevolg het, was nie emosionele opwinding of verbeelding nie – dit was werklik en tasbaar. Die Heilige Gees het in daardie vertrek beweeg en verskeie mense het Hom op ’n diep persoonlike manier beleef. Hulle lewens is aangeraak en baie kon nie ophou getuig dat Hy hulle persoonlik ontmoet het nie. Wat ’n voorreg. Hier is dus drie punte om oor na te dink wanneer dit kom by die belewenis van die Heilige Gees.
Kyk binne-in – Hy is reeds daar
Ons kyk dikwels op na die hemel en wag dat God moet beweeg, terwyl Hy reeds binne-in ons woon. Die Heilige Gees is nie ver nie – Hy is teenwoordig, persoonlik en naby. Jy is nooit alleen nie. In jou stil oomblikke, jou worstelstryd en selfs jou onsekerheid is Hy daar. “Of besef julle nie dat julle liggaam ‘n tempel van die Heilige Gees is nie” (1 Kor 6:19).
Kyk vorentoe – jy dra sy krag
Die Heilige Gees binne-in jou is nie passief nie. Hy is dunamis-krag – opstandingskrag. Dit beteken ons verduur nie net die lewe nie, ons het gesag in Jesus se Naam om in situasies in te spreek. Jy kan met vrymoedigheid bid en glo vir verandering, nie oor wie jy is nie, maar oor Wie binne-in jou woon. “Omdat die Gees van Hom deur wie Jesus uit die dood opgewek is, in julle woon” (Rom 8:11).
Kyk rondom jou – laat Hom deur jou werk
Die Heilige Gees was nooit bedoel om net binne-in ons te bly nie. Hy vloei deur ons – na ons families, werkplekke en gemeenskappe. Deur ons woorde, dade en gehoorsaamheid word ons draers van sy teenwoordigheid vir ’n wêreld wat Hom desperaat nodig het. “Maar julle sal krag ontvang wanneer die Heilige Gees oor julle kom, en julle sal my getuies wees” (Hand 1:8). Mag ons nie net onthou wat in die bovertrek gebeur het nie, maar ook besef dat die Gees nou binne-in ons woon en mag ons daarvolgens leef.
Hierdie artikel verskyn in die Junie 2026 uitgawe van JUIG! Tydskrif. Lees die digitale weergawe van hierdie tydskrif hier: joygifts.co.za
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Fotos verkry deur oorspronklike artikel gepubliseer in die JUIG! Tydskrif; Junie 2026
Datum gepubliseer: 19/05/2026
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy ni
