Persverklaring deur YouVersion
–Artikelbron: Verskaf
YouVersion, ontwikkelaars van die Bible App-toepassing, maak ’n Suid-Afrika-Sentrum oop, met Afrika aan die voorpunt van wêreldwye groei in interaksie met die Bybel
Na jare se vennootskap met Afrika-bedieninge maak YouVersion ’n streeksentrum in Suid-Afrika oop om die toenemende momentum in interaksie met die Bybel regoor die vasteland te ondersteun.
KAAPSTAD, Suid-Afrika – 27 Februarie 2026 – YouVersion, ontwikkelaar van die Bible App, die wêreld se gewildste Bybeltoepassing, het ’n streeksentrum in Suid-Afrika oopgemaak om die beduidende momentum in interaksie met die Bybel wat reeds regoor Afrika plaasvind, te ondersteun. Die openingsverrigtinge op 26 Februarie 2026 merk ’n verdiepte verbintenis tot vennootskappe met plaaslike kerke, inhoudskeppers en leiers wat nog meer Afrikastemme by die Bible App-toepassing voeg.
Suid-Afrikaners se florerende interaksie met die Bybel het dit ’n natuurlike tuiste vir die streeksentrum gemaak. Die toepassing is byna 29 miljoen keer afgelaai, en met 11% jaar-tot-jaar-groei in daaglikse gebruik tel Suid-Afrika onder die top vyf lande wêreldwyd wat betref daaglikse interaksie met die Bybel. Dit is veral beduidend gegewe die buitengewone groei in interaksie met die Bybel regoor die vasteland.
Die sentrum se span bestaan uit mense wat al baie jare in die streek woon en werk en diep wortels in die geloofsgemeenskap het. Hierdie verbintenis maak outentieke vennootskappe moontlik met plaaslike kerke, inhoudskeppers en bedieningsleiers wat ‘n invloed het op hoe die Skrif hul gemeenskappe bereik.
Nqobile Ngcobo, leier van die Suid-Afrika-Sentrum en aanbieder van die viering, sê: “Ons diep wortels hier stel ons in staat om met plaaslike stemme saam te werk om inhoud te skep wat Afrika-ervarings outentiek weerspieël. Ons het die Skrif se transformerende krag uit die eerste hand waargeneem, en ons is toegewy daaraan om te help dat Afrikane met God se Woord omgaan deur middel van hul eie tale, kulturele uitdrukkings en geloofsverhale. Hierdie viering is net die begin van hoe ons mense rondom ’n gedeelde visie gaan saambring om mense oraloor te help om elke dag interaksie met die Skrif te hê.”
Benewens inhoudontwikkeling het die span se plaaslike kundigheid ‘n invloed op hoe YouVersion gebruikers regoor die vasteland bedien. Hulle verstaan die alledaagse realiteite wat mense in die gesig staar, insluitend datakoste wat elke megagreep laat tel en konnektiwiteitsuitdagings in landelike gebiede. Bible App Lite, ontwerp vir beperkte foonberging en aanlyngebruik, is ontwikkel met Afrika-gebruikers se behoeftes in gedagte. Leerervarings uit Afrika-gemeenskappe vorm Bible App Lite se ontwikkeling al sedert 2022, en daardie innovasies help nou mense oral oor die wêreld wat met soortgelyke beperkings moet werk.
Mense regoor die vasteland kan toegang kry tot die Skrif in hul moedertaal – Swahili, Afrikaans, Xhosa, Zulu en baie ander Afrikatale is beskikbaar onder die byna 2 400 tale wat in die Bible App aangebied word. Hierdie verbintenis tot Afrikatale strek selfs tot die jongste gebruikers. Bible App for Kids is beskikbaar in Afrikaans en Swahili, wat kinders help om in hul moedertaal interaksie met die Skrif te hê deur interaktiewe animasies en prettige aktiwiteite. Al YouVersion se toepassings is gratis om af te laai en te gebruik, wat finansiële hindernisse vir toegang tot God se Woord verwyder.
In sy toespraak by die openingsgeleentheid het YouVersion-stigter en HUB Bobby Gruenewald gesê: “Die momentum wat ons regoor Afrika sien, is merkwaardig. God doen iets kragtigs deur plaaslike kerke, bedieninge en leiers wat passievol is oor Sy Woord. Ons is dankbaar dat ons vir Nqobile en haar span het om die YouVersion Suid-Afrika-Sentrum te lei. Hulle bring diep verhoudings, kulturele begrip en outentieke verbintenisse wat sal help verseker dat miljoene Afrikane deur die Bible App interaksie met die Skrif kan hê op maniere wat werklik by elkeen van hulle aanklank vind.”
Oor YouVersion YouVersion is geskep deur Life.Church en ontwerp gratis, Bybelgesentreerde ervarings wat mense aanmoedig en uitdaag om elke dag na God te streef. Die YouVersion-familie van toepassings – insluitend die Bible App, Bible App Lite en Bible App for Kids– is wêreldwyd al op meer as een miljard toestelle geïnstalleer. Die Bible App bied ’n Bybel-ervaring in byna 2 400 tale aan en help mense om hul verhouding met God te verdiep. Bible App Lite is geoptimaliseer vir vanlyngebruik en help mense om toegang tot God se Woord te kry in markte met toestel- en databeperkings. Bible App for Kids is ontwikkel in vennootskap met OneHope en help kinders om interaksie met die Bybel te hê deur interaktiewe animasies en prettige aktiwiteite. Vir meer inligting oor YouVersion, besoek youversion.com
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Fotos verskaf
Datum gepubliseer: 09/03/2026
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
