Stryd oor prostitusiewette: CFJ en vennote sluitaan in Hooggeregshof-saak

Saamgestel deur: Anjoné de Jager
Inligting verskaf deur: Cause for Justice 

Suid–Afrika staan op ’n kritieke kruispad in ’n saak wat die land se morele waardes en regsraamwerk kan hervorm. Op 1 en 2 September 2025 het die Hooggeregshof in Kaapstad beslis oor wie mag deelneem aan die baanbrekersaansoek om prostitusie te dekriminaliseer. Cause for Justice (CFJ), saam met ’n koalisie van organisasies, is as respondente toegelaat en sal nou begin om hul teenargumente voor te berei.

Die hof het ook ’n tydlyn bevestig wat lei tot die volle verhoor, wat geskeduleer is vir 18–20 Mei 2026. Vir CFJ en sy vennote is dit meer as bloot ’n regsgeding – dit is ’n standpunt om die waardigheid van elke persoon te beskerm, gesinne te verdedig, en gemeenskappe te bewaar teen die verwoestende impak van prostitusie.

Hofverrigtinge: 1 en 2 September 2025
Op 1 en 2 September 2025 het die Hooggeregshof in Kaapstad betoë van regspanne van vyf opponerende partye aangehoor, in die hofsaak om prostitusie te dekriminaliseer. Daarbenewens het 16 voornemende vriende van die hof (amici curiae) ook voor die hof verskyn. Altesaam 21 partye moes die hof probeer oorreed dat hulle toegelaat word om deel te neem of tot die geding by te dra. Van die 16 amici ondersteun 14 die dekriminalisering van prostitusie, terwyl twee amici gekant is teen volle dekriminalisering.

Toelating van respondente
Op Maandag 1 September, ná die aanhoor van die twee regsverteenwoordigers vir die vyf intredende respondente – Cause for Justice en ’n koalisie van vier organisasies (een plaaslik en drie buitelands) – het die hof (voorsittende regter Le Grange) beslis dat die intredende respondente voldoende gronde het vir toetrede. Hulle is dus toegelaat om as respondente aan die saak deel te neem.

Beslissing oor amici curiae
Die hof se beslissing oor die toelating van die 16 amici is uitgestel tot Dinsdag, 2 September. Die regter het op Maandag aangedui dat hy moontlik die aantal amici sou wou inperk. Nietemin het die hof op Dinsdag al 16 amici tot die saak toegelaat, en steun geplaas op paragraaf [80] van die uitspraak van die Konstitusionele Hof in Koyabe v Minister of Home Affairs [2009] ZACC 23:

“Amici curiae have made and continue to make an invaluable contribution to this Court’s jurisprudence. Most, if not all constitutional matters present issues, the resolution of which will invariably have an impact beyond the parties directly litigating before the Court. Constitutional litigation by its very nature requires the determination of issues squarely in the public interest, and in so far as amici introduce additional, new and relevant perspectives, leading to more nuanced judicial decisions, their participation in litigation is to be welcomed and encouraged.”

Tydlyne bepaal deur die hof

Die hof het die volgende sperdatums vasgestel:
•Twee van die amici curiae (Women’s Legal Centre en TriangleProject), wat beoog om getuienis/verslae in te dien, moet dit doen teen 19 September 2025.
•Die intredende respondente, insluitend Cause for Justice, moet hul beantwoordende beëdigde verklarings (die feitelike basis van hul opposisie) teen 13 Oktober 2025 indien.
•Die applikante moet hul repliserende verklarings teen 3 Desember 2025 indien.

Die hof het verder aangedui dat die verhoor van die hoofsaak in die tweede kwartaal van 2026 sal
plaasvind. Dit is intussen bevestig dat die saak van 18 tot 20 Mei 2026 aangehoor sal word.
Wat is volgende vir Cause for Justice?

As gevolg van die hof se beslissings op 1 en 2 September, begin Cause for Justice nou met die groot
taak om die openbare belang in die behoud van die kriminele verbod op prostitusie te
verteenwoordig. Hul fokus is om hul opponerende hofstukke voor te berei en teen 13 Oktober 2025
in te dien.

Wil jy die groter prentjie verstaan? In die September–uitgawe van JUIG! Tydskrif delf ons dieper in
hierdie saak–ons kyk na die Bybelse, morele en regsimplikasies, en hoor van toonaangewende
stemme in die Kerk en burgerlike samelewing. Moet dit nie misloop nie!

Kry jou eksemplaar[Hier]

Datum gepubliseer: 04/09/2025
Foto’s verskaf

VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.