Artikelbron: cvandaag.nl
Die situasie in die noorde van Mosambiek bly gespanne weens djihadistiese aanvalle op die bevolking, die weermag en veral kerke en Christene, berig Aid to the Church in Need en plaaslike vennote van Geopende Deure.
Volgens die Verenigde Nasies se vlugtelingagentskap is bykans 670 000 Mosambiekers reeds ontwortel as gevolg van die geweld deur radikale Islamitiese groepe. Militêre optrede deur die weermag het tot dusver min aan die situasie verander.
Hoewel daar verskeie aanvalle op militêre poste was, word kerke en Christene ook in Mosambiek se noordelike provinsies geteiken. Op 12 Februarie is ’n kerk en kerklike buitegeboue in die hawestad Mazeze aan die brand gesteek ná ’n terreuraanval. ’n Hospitaal en ’n mark is ook vernietig.
Volgens Aid to the Church in Need het terroriste lojaal aan Daesh (IS) op 9 Februarie drie gemeenskappe in Cabo Delgado aangeval. ’n Onbekende aantal mense is vermoor of ontvoer, en honderde inwoners het gevlug. In sulke aanvalle word talle gelowiges verkrag of vermoor, en kerke en huise vernietig.
Islamitiese terroriste het onlangs die Christen-bevolking gewaarsku om hulle tot Islam te bekeer. Vyf Christene in die dorpie Chai is op 31 Januarie aangeval. ’n Jong man is gevang terwyl hy tevergeefs probeer het om sy pa teen onthoofding te beskerm. Drie ander jongmense het daarin geslaag om te vlug en die polisie in kennis gestel. Ná ’n soektog is die onthoofde liggaam van die pa gevind, maar die seun word steeds vermis.
Volgens plaaslike vennote dwing die herhaalde aanvalle die bevolking om na vlugtelingkampe te trek. Talle vlugtelinge bly besig met los werkies en moet oorleef deur slakke en ntete te eet – ’n plaaslike kruid. Ntete is egter skadelik vir die gesondheid.
Geopende Deure help al vier jaar lank die kerk in Mosambiek deur noodhulp, traumasorg en opleiding te verskaf.
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
Datum gepubliseer: 26/02/2024
Foto slegs ter illustrasie. Kunswerke aangepas uit freepik.com
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
