Artikel bron verskaf deur Africa Films
Die lewe het kuns nageboots op 19 Desember 2025, toe die Suid-Afrikaanse animasiefilm David landwyd in Noord-Amerikaanse teaters vrygestel is – op dieselfde dag as Avatar: Fire and Ash, The SpongeBob Movie: Search for SquarePants en The Housemaid.
Ter konteks: die eerste twee Avatar-rolprente beklee die eerste en derde plek op die wêreldwye box office lys van alle tye; SpongeBob word dikwels beskryf as “die mees gememe TV-reeks ooit”; en The Housemaid is ’n verwerking van Freida McFadden se topverkoper-riller, met Sydney Sweeney – IMDb se vyfde gewildste ster van 2025 – in die hoofrol.
In David staan ’n jong skaapwagter na vore wanneer die reus Goliat ’n nasie terroriseer. Hy is gewapen met net ’n slingervel, ’n paar klippe en onwrikbare geloof.
In ’n verrassing van Dawid teen Goliat-proporsies het die Bybelse animasie beide SpongeBob en The Housemaid in Noord-Amerika uitgestof en tweede geëindig – net agter Avatar: Fire and Ash.
David is op meer as 3 000 skerms vrygestel en het $22 miljoen oor die openingsnaweek by die binnelandse box office verdien. Dit is die grootste driedaagse openingsnaweek in Angel Studios se geskiedenis en oortref selfs Sound of Freedom, wat later meer as $250 miljoen wêreldwyd verdien het.
Dit is ook die grootste openingsnaweek nóg in die VSA vir ’n geloofsgebaseerde animasiefilm – groter as beide Angel se eie The King of Kings en die Oscar-bekroonde The Prince of Egypt.
Verder is dit die beste opening vir ’n Suid-Afrikaanse rolprent in Noord-Amerika sedert District 9 in 2009.
Vier weke later is David steeds in die VSA se top 10 en het reeds meer as $75 miljoen in Amerika alleen verdien. Dit plaas die film op nommer 35 op Box Office Mojo se lys van die hoogste verdienende rolprente van 2025 in Amerikaanse teaters en binne die top 10 vir animasiefilms, selfs voordat die vertoningsiklus afgehandel is.
Phil Cunningham en Brent Dawes het die musikale epos geregisseer. Albei is in Zimbabwe gebore en is nou in Kaapstad gevestig. Hulle het leiding geneem oor meer as 400 plaaslike en internasionale kunstenaars en spanlede – deels intern by Sunrise Productions se ateljee in Noordhoek en deels afgeleë oor 32 lande.
“Na 30 jaar se droom, beplanning, harde werk, mislukking en weer probeer, is dit ongelooflik om die film daar buite te sien,” sê Phil. “Ons het beoog om ’n Arc de Triomphe te skep, ’n baken van inspirasie vir ons geslag. Daarom is dit besonders om soveel verhale te hoor van hoe die film mense werklik bemoedig en inspireer. Dit is moeilik om die regte woorde te vind om die ongelooflike span te bedank wat soveel opgeoffer het om dit moontlik te maak.”
“Dit was ’n ongelooflike voorreg om vir meer as tien jaar saam met soveel mense in soveel lande te werk,” sê Brent. “Om te sien hoe mense uit uiteenlopende agtergronde die visie aangryp en onvermoeid saamwerk om dit lewendig te maak, was iets besonders. Phil en ek het eerstehands gesien wat gebeur wanneer inspirasie, passie en talent bymekaarkom. David is ’n rolprent wie se tyd aangebreek het – ons almal het dit gevoel. Dit moes so wees, en ek voel bevoorreg om deel daarvan te kon wees.”
Sunrise se werk is herhaaldelik deur vooraanstaande internasionale media geloof. Rotten Tomatoes se kritici het die film se “pragtig geanimeerde agtergronde” geprys; The New York Times het die detail “verrassend indrukwekkend” genoem; en Variety het David beskryf as “’n skouspelagtige vertoonvenster vir die tegniese vermoëns van die Suid-Afrikaanse animasiehuis Sunrise Productions”.
Gehoorreaksie was net so positief. David het ’n A CinemaScore en ’n 98% Rotten Tomatoes-gehoortelling ontvang.
Die Grammy-benoemde Phil Wickham lei die rolverdeling as die volwasse Dawid en sing die musiek, gekomponeer deur Joseph Trapanese (The Greatest Showman).
David vertoon steeds in Noord-Amerika en Suid-Afrika, met planne om die film teen 1 Januarie 2027 in 44 internasionale markte vry te stel.
Kyk die amptelike lokprent, met meer as 5 miljoen kyke:
https://www.youtube.com/watch?v=uv9V3dk98PM
Luister na die amptelike klankbaan:
https://lnk.to/DavidSoundtrack
Bespreek nou via Ster-Kinekor of Nu Metro.
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Datum gepubliseer: 21/01/2026
Foto’s verskaf deur Africa Films
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
