Paasfees gaanoor deelname aan die missie van God

Geskryf deur: Dr Curt Watke
Artikelbron: JUIG! Tydskrif

Wel, as dit ’n slang was het dit jou gepik!” Het jy al daardie uitdrukking gehoor? Dit beteken dat iets reg voor jou en heeltemal voor die hand liggend is, maar om een of ander rede sien jy dit nie raak nie. Het dit al ooit met jou gebeur?

Bestudering van die Woord
Ons het onlangs ’n Bybelskool by ’n groot kerk in ons omgewing besoek. Dit was asof ’n reuse slang in die vertrek was, maar niemand het dit raakgesien nie. Die gedeelte wat bestudeer is, was Johannes 20, wat die Paasfeesverhaal uitlig (insluitend Jesus se verskyning aan Maria Magdalena, die dissipels, en Thomas. Die hoofstuk eindig met Johannes se verklaring van hoekom hy sy evangelie geskryf het – ’n sleutelteks om hierdie Paasfees te bespreek.) Die groep het die teks vir meer as ‘n uur deeglik ontleed. Hulle het gesels oor hoe die linneklere gelê het en bespiegel oor die Turynse kleed en ander argeologiese bewyse. Hulle het Jesus se verhouding met Maria Magdalena bespreek en hoe sy moes gevoel het. Daar was ook gesprekke oor hoe skrikwekkend dit vir die dissipels moes gewees het toe Jesus voor hulle verskyn met sy woorde: “Vrede vir julle!” ’n Groot deel van die gesprek het gegaan oor of Thomas regtig as “twyfelend” beskou kan word.

Maar hulle het die ooglopende gemis…
Net daar, in rooi letters (as jou Bybel die woorde van Jesus in rooi het), staan Jesus se opdrag aan sy dissipels: “Soos die Vader My gestuur het, stuur Ek julle ook.” Sjoe! Net soos God die Vader vir Jesus gestuur het om geïnkarneer te word en “onder ons te kom woon” om ’n lig vir die wêreld te wees, so stuur Jesus ook sy dissipels om dieselfde te doen.

Die oorkoepelende narratief van die Skrif
Die sending of missie van God (missio Dei) is die oorkoepelende narratief van die Skrif, wat God se verlossingswerk in die wêreld openbaar. Die kern van hierdie sending is die stuur van Jesus Christus, wat volkome deelgeneem het aan die Vader se plan om die mensdom en die hele skepping met Homself te versoen. Van sy menswording tot sy dood en opstanding het Jesus die goddelike sending beliggaam, deur God se liefde, geregtigheid en genade in die wêreld te demonstreer. Sy deelname aan hierdie sending het uitgeloop op Paasfees, waar sy dood en opstanding redding verseker vir almal wat glo. “Gestuurdheid” is die kern van die Paasverhaal – Jesus neem deel aan God se sending en stuur sy volgelinge om dieselfde te doen.

Deelname aan God se sending
Die Vader het Jesus na die wêreld gestuur as die uiteindelike uitdrukking van sy liefde en verlossingsplan. Johannes 3:16 verklaar: “God het die wêreld so liefgehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê.” Die inkarnasie – God wat mens word – was die begin van Jesus se aardse sending. Deur mens te word, het Jesus tussen mense gewoon, hulle lyding ervaar, goddelike deernis getoon en die Koninkryk van God verkondig.

Jesus het God se missie vervul
Deur sy hele bediening het Jesus aan God se sending deelgeneem deur die Goeie Nuus te verkondig, siekes te genees, demone uit te dryf en gebroke lewens te herstel. Lukas 4:18-19 som sy sending op: “Die Gees van die Here is op My omdat Hy My gesalf het om die evangelie aan armes te verkondig. Hy het My gestuur om vrylating vir gevangenes uit te roep en herstel van gesig vir blindes, om onderdruktes in vryheid uit te stuur, om die genadejaar van die Here aan te kondig.” Hierdie dade weerspieël die hart van God se sending – om herstel, hoop en verlossing vir ’n verlore wêreld te bring.

Paasfees: die vervulling van Jesus se sending
Die hoogtepunt van Jesus se sending op aarde was sy dood en opstanding. Sy kruisiging was nie ’n ongeluk nie, maar ’n noodsaaklikheid in God se verlossingsplan. In Johannes 10:18 bevestig Jesus sy vrywillige deelname aan die Vader se sending: “Niemand neem dit van My af nie, maar Ek lê dit uit my eie af. Ek het die volmag om dit af te lê, en Ek het die volmag om dit weer op te neem. Dit is die opdrag wat Ek van my Vader ontvang het.” Sy lyding en dood het versoening gebring vir die sondes van die mensdom en die profesie van Jesaja 53:5 vervul: “Oor óns oortredings is hy deurboor, oor óns sondes is hy verbrysel; die straf wat vir ons vrede moes bring, was op hom, deur sý wonde het daar vir ons genesing gekom.”

Jesus se volgelinge is gestuur om deel te neem
Die opstanding was die uiteindelike oorwinning oor sonde en die dood en bevestig God se krag en getrouheid in sy sending. Ná sy opstanding beklemtoon Jesus sy dissipels se rol in hierdie sending. In Johannes 20:21 sê Hy vir hulle: “‘Vrede vir julle!’ sê Hy weer vir hulle. ‘Soos die Vader My gestuur het, stuur Ek julle ook.’” Hierdie verklaring bevestig dat God se sending voortgaan deur sy volgelinge. Net soos Jesus gestuur is om die Koninkryk van God te verkondig, is sy dissipels geroep om hierdie missie voort te sit deur die Evangelie te versprei, ander te dien en Christus se liefde in hul daaglikse lewens te beliggaam. Deur die leiding van die Heilige Gees word gelowiges aktiewe deelnemers aan God se verlossingsplan, waardeur sy genade en waarheid aan die hele skepping uitgedra word.

Prioritiseer ons deelname aan God se missie?
Het ons so gewoond geraak aan die konsep van “gestuurdheid” dat ons dit eenvoudig miskyk? Besef ons nie dat God, van Genesis tot Openbaring, steeds stuur nie? Hy stuur Homself, sy Seun, die Gees – en Hy nooi ons uit om deel te neem aan sy sending, wat meer as 100 keer in die Bybel genoem word. Het ons vergeet waarom Jesus gekom het en waartoe ons geroep is – om te wees, te doen en te sê – as gevolg daarvan?

DR CURT WATKE – ’n vooraanstaande missioloog en president van Missional University. E-pos cwatke@missional.university

Klik hier om OP HOOGTE van die nuus te bly deur op ons GRATIS weeklikse nuusbrief in te teken.

Datum gepubliseer: 20/04/2025
Foto slegs ter illustrasie.

VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.