Artikelbron: morningstarnews.org
’n Jong leerlingpriester is dood in ’n aanval deur Moslem-terroriste op ’n Rooms-Katolieke kerk in Nigerië. Die 25-jarige man is lewend verbrand in die pastorie van die kerk wat deur die terroriste aan die brand gesteek is. Daar is ’n beroep op die Nigeriese regering gedoen om in te gryp in die streek waar daaglikse (dodelike) geweld teen Christene plaasvind.
Die aanval het op Donderdag, 7 September plaasgevind. Omstreeks 20:00 die aand het Fulani-veewagters die pastorie van die Sint Raphael-kerk in Fadan Kamantan, ’n dorpie in die staat Kaduna, bestorm. Die terroriste se doel was om die priester te ontvoer. Hulle kon egter nie die pastorie binnegaan nie en het besluit om dit aan die brand te steek. Die priester, Emmanuel Okolo, het daarin geslaag om saam met sy assistent te ontsnap. Maar die 25-jarige seminaar Na’aman Danlami het in die see van vlamme gesterf.
Eerw. John Hayab, die voorsitter van die Christelike Vereniging van Nigerië (CAN), het in ’n verklaring aan Morning Star News die gebrek aan sekuriteit vir Christene in die streek betreur. “Dit is hartseer dat hierdie euwel teen Christene steeds plaasvind, dat Christene steeds vermoor word. Ons het herhaaldelik ’n beroep op die Nigeriese regering gedoen om maatreëls teen hierdie aanvalle te tref. Ons doen dit nou weer.”
In geen land ter wêreld is soveel Christene in 2022 vermoor soos in Nigerië nie, het die Wêreldwaarnemingslys van 2023 gewys. Die land is ook voor op die lys met die bekendste gevalle van ontvoering, verkragting, mishandeling en intimidasie. Nigerië is ook die land waar die meeste geboue en eiendomme weens godsdienstige redes vernietig word.
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
Datum gepubliseer: 12/09/2023
Foto: ACN en Morning Star News skermskoot
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
