Geskryf deur: FEBA Radio SA
Artikelbron: JUIG! Tydskrif
In ’n klein dorpie in Ratanakiri – ’n afgeleë provinsie in die noordooste van Kambodja – het ’n vrou saam met haar 11-jarige dogtertjie gebly. Die gebied was só geïsoleer dat slegs kortgolfradio dit kon bereik. Elke dag het die vrou ingeskakel op FEBA Kambodja se programme.
Eendag het die dogtertjie ’n hoë koors ontwikkel. Desperaat het haar ma haar met ’n rowwe pad langs na die naaste hospitaal gedra, maar voordat hulle daar aangekom het, het die kind opgehou asemhaal. Dorpenaars het gekom om die verpletterde ma te troos. Sy het onthou wat sy in FEBA se programme gehoor het, en gebid: “Here, laat U wil geskied.”
Haar dogter se liggaam is in ’n kis geplaas, gedeeltelik oopgehou en versier met stamversierings. Roubeklaers het bymekaargekom. Die ma het gebid. Teen sonsondergang het ’n besoekende pastoor by hulle aangesluit en gesê: “Gee alles aan God.” Huilend het die ma langs die kis gekniel en uitgeroep: “Jesus, U is die opstanding en die lewe. As dit U wil is, bring my dogter terug!” In die geskokte stilte wat daarop gevolg het, het die dogtertjie skielik beweeg. Haar oë het stadig oopgegaan, en sy het regop gesit. Sy het rondgekyk na die verbaasde dorpenaars. Rou het in vreugde verander. In die weke wat gevolg het, het baie dorpenaars vir die eerste keer kerk toe gegaan – gretig om meer te weet oor die God wat ’n klein dogtertjie uit die dood opgewek het.
Toegewyde hande
FEBA het in 1953 begin om per kortgolf na Kambodja uit te saai, maar eers in 1995 is hulle toegelaat om ’n radiostasie binne die land te vestig. Hulle het dit Krusa (wat “familie” beteken) FM genoem. Oor die afgelope 30 jaar het die stasie ’n lojale gehoor oor die hele land opgebou.
Vroeër vanjaar het Krusa FM na ’n nuwe, selfonderhoudende toring oorgeskakel, wat die gehalte en reikafstand van hulle uitsendings aansienlik verbeter het. Benewens radio en ’n groeiende teenwoordigheid op sosiale media, bedryf FEBA Kambodja ook die OB (buite-uitsending) Van Mission – wat die Evangelie na die strate neem en regstreekse uitsendings van Christenfeeste en byeenkomste doen. Tog lê die hart van hulle bediening steeds by die miljoene in die platteland.
Familie is belangrik
Familie is ook sentraal tot Krusa FM se bediening. Baie mense weet nie hoe om gesonde verhoudings te bou nie – minstens 20% van vroue ervaar mishandeling deur ’n intieme lewensmaat, en dit is ’n konserwatiewe skatting.
Hierdie gebrokenheid het diep wortels. “As gevolg van die Khmer Rouge is die hele betekenis van familie en liefde verdraai,” verduidelik ’n personeellid. “Gesinne is uitmekaar geskeur. Elke familie het iemand verloor. Daardie trauma leef steeds in mense se harte voort.”
Om te help, werk FEBA Kambodja saam met kerkleiers om familieseminare in stedelike én landelike gebiede aan te bied. Ongeveer 50 gesinne woon elke geleentheid by en leer hoe om sterk huishoudings op Bybelse beginsels te bou.
In die skadu van die Khmer Rouge
Christenskap het die eerste keer in 1923 in Kambodja aangekom, maar is met groot teenstand begroet. Gelowiges het wrede vervolging in die Pol Pot-era verduur, wat 90% van die Christenbevolking uitgewis het. Selfs vandag is minder as 3% van Kambodjane Christene. Boeddhisme is die amptelike godsdiens en is so diep in die kultuur verweef dat dit min ruimte laat vir mense om Christus te leer ken. Toegang bly ’n uitdaging. Die nalatenskap van die Khmer Rouge sluit wydverspreide armoede en swak geletterdheid in. Ongeveer 75% van Kambodjane woon op die platteland – baie huise het geen elektrisiteit, swak selfoonontvangs, en geen toegang tot FM-radio nie. Tog het hierdie struikelblokke vir FEBA geleenthede geword.
Die Evangelie is noodsaaklik vir genesing van ’n mens se verlede
Deur sy getroue en innoverende bediening speel FEBA Kambodja ’n kragtige rol in die genesing van sy mense. Sy slagspreuk nooi luisteraars uit om die transformerende krag van God se Woord te ervaar: Ontvang vandag hulp; ervaar hoop vir die toekoms.
Geskenk van lig en hoop
FEBA verwag nie net dat mense sal inskakel nie, maar hulle maak dit moontlik. Krusa FM se personeel reis oor die hele land en versprei sonkragaangedrewe radio’s en ligte na afgeleë dorpies. In Maart het hulle 100 gesinne in Mondulkiri en Ratanakiri besoek – twee van die geestelik mees behoeftige provinsies. Gelowiges het die radio’s met dankbaarheid ontvang: “Ons kerk is só ver, maar nou kan ons elke dag God se Woord by die huis hoor.”
Die span versprei ook Bybelklankbokse. “Hierdie toestelle is baie nuttig,” sê FEBA Kambodja se direkteur, “veral in gebiede sonder elektrisiteit. Mense gebruik dit om die Bybel te hoor, wat op die toestel se geheue gestoor is. Dis maklik om te gebruik en laai met sonkrag. Die paneel is klein en draagbaar – mense bind dit aan ’n kar, trekker of selfs ’n buffel vas terwyl hulle werk.”
Hierdie geskenke verander lewens. ’n Bejaarde luisteraar het gedeel: “Ek was altyd bang vir die donker en het gebid vir lig. Nou hoef ek nie meer bekommerd te wees nie – ek het ’n sonlig wat my huis verlig. En ’n radio wat liedjies speel om my elke dag geselskap te hou.”
SLUIT AAN BY FEBA SE BEDIENING
As jy ’n skenking wil maak vir hierdie lewensveranderende projek, besoek asseblief ons webwerf by febaradio.co.za of skakel 012 335 5708.
…om die volle artikel te lees, skaf gerus vir jou hierdie JUIG Tydskrif aan! Koop eksemplare by toonaangewende supermarkte, of vind dit (druk of digitaal) aanlyn by joygifts.co.za.
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Datum gepubliseer: 07/08/2025
Foto’a verskaf.
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
