Deur Amike Viljoen
Artikel verskaf deur FOR SA
FOR SA verwelkom die ANC se verklaring oor godsdiensvryheid en doen ’n beroep op die CRL-regtekommissie om sy koers ten opsigte van die Artikel 22-proses te verander.
Freedom of Religion South Africa (FOR SA) verwelkom die African National Congress (ANC) se verklaring van 13 Oktober 2026, waarin hy sy verbintenis tot godsdiensvryheid herbevestig. Ons verwelkom ook die ANC se verbintenis tot konstruktiewe gesprekvoering met die South African Church Defenders (SACD) en die breër geloofsgemeenskap. FOR SA prys die ANC daarvoor dat hy gehoor gee aan die bekommernisse wat deur geloofsgemeenskappe regoor die land geopper is.
In sy verklaring het die ANC gesê dat hy “nie gevra het vir, of gepleit het vir, staatsregulering of -beheer oor kerke en hul godsdienstige aangeleenthede nie”, en dat “kerke en godsdienstige instellings vry moet wees om hul eie sake te bestuur en te reguleer binne die raamwerk van die Grondwet”. Hy het ook gesê dat hy “onwrikbaar” bly in sy verdediging van die regte van alle godsdienstige gemeenskappe, insluitend godsdienstige minderhede.
The Citizen het oor die verklaring berig onder die opskrif “ANC distansieer hom van voorgestelde regulering van kerke deur CRL-kommissie”. Dit het berig dat, volgens die ANC se woordvoerder, die CRL-regtekommissie (CRL) se voorstel om kerke te reguleer nie deur die party ondersteun word nie. FOR SA deel hierdie interpretasie van die ANC se standpunt.
Die CRL en sy Artikel 22-komitee beskryf hul voorstelle as “selfregulering”, aangesien godsdiensleiers in die voorgestelde raad sou dien. Die Artikel 22-komitee se opdrag en konsepraamwerk maak egter voorsiening vir konsultasie oor ’n wetlike raamwerk vir ’n beroepsraad, asook vir die registrasie van godsdiensinstansies en godsdienspraktisyns. ’n Liggaam wat deur wetgewing geskep, gemagtig of afgedwing word – en wat oor die bevoegdheid beskik om godsdiensleiers te registreer, te lisensieer of aan sanksies te onderwerp – behels nie dat kerke en godsdiensinstansies hul eie sake bestuur nie. Volgens FOR SA is dit staatsregulering, ongeag wie daarin dien of wat dit genoem word.
FOR SA verstaan gevolglik die ANC se standpunt so dat godsdienstige gemeenskappe vry moet wees om hulself te bestuur, en dat die ANC nie wetgewing steun wat hulle onder so ’n statutêre reguleringsliggaam sou plaas nie. Hierdie vertolking strook met die ANC se verklaarde verbintenis tot die Grondwet, wat godsdiens-, oortuigings- en meningsvryheid, vryheid van assosiasie, asook die regte van godsdienstige gemeenskappe beskerm. FOR SA verwelkom ook die SACD se besluit om sy beplande optog na Luthuli House op te skort – as ’n gebaar van goeie trou na aanleiding van die ANC se verklaring.
Die CRL-regtekommissie moet nou van koers verander
In die lig van die ANC se verklaring, en die wydverspreide teenkanting teen die Artikel 22-proses binne geloofsgemeenskappe, doen FOR SA ’n beroep op die CRL om die huidige proses op te skort. Verder behoort die opdrag en konsepraamwerk van die Artikel 22-komitee óf gewysig te word om enige voorsiening vir wetgewing, ’n statutêre raad, of die registrasie of lisensiëring van godsdienstige instellings en leiers te skrap, óf die proses behoort beëindig te word. Na FOR SA se mening is dit moeilik om te regverdig dat openbare geld steeds bestee word aan ’n proses wat nie deur die grootste party in die Regering van Nasionale Eenheid (RNE) ondersteun word nie. FOR SA doen ook ’n beroep op die Parlement se regsadviseurs om, sonder verdere versuim, hul agterstallige opinie oor die wettigheid van die instelling van die Artikel 22-komitee en die opdrag daarvan te finaliseer.
Die regte antwoord op misbruik
FOR SA se standpunt is dat bestaande wette van algemene toepassing die regte antwoord is op misbruik, bedrog en wangedrag deur enigiemand, insluitend godsdiensleiers. Dit sluit wette in wat verband hou met strafreg, kinderbeskerming, belasting, verbruikersbeskerming en nie-winsgewende organisasies, en hierdie wette moet behoorlik toegepas word. Godsdiensgemeenskappe bly vry om hul eie vrywillige verenigings en gedragskodes te vorm en is net so vry om dit weer te verlaat. Sulke liggame moet aan die gemeenskappe self behoort en deur hulle bestuur word; hulle moet nie deur die staat ingestel of ondersteun word nie.
FOR SA is niepartydig, en hulle verwelkom duidelike verbintenisse tot godsdiensvryheid van elke politieke party. Op 7 Oktober 2026 het FOR SA aan elke party wat in die Nasionale Vergadering verteenwoordig word, geskryf om te vra wat hul standpunt oor staatsregulering van godsdiens is; hulle ontvang tans reaksies hierop. Hulle bly oop vir voortgesette gesprekvoering met die ANC, sowel as met alle ander partye, oor hierdie kwessie. Godsdiensvryheid behoort aan elke Suid-Afrikaner – ongeag of hulle ’n geloof aanhang en of hulle geen geloof het nie.
Klik hier om OP HOOGTE van die nuus te bly deur op ons GRATIS weeklikse nuusbrief in te teken
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Hoof foto verskaf deur verkry vanaf Ground Up
Fotograaf: Ashraf Hendricks
Datum gepubliseer: 16/10/2026
VRYWARING: JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
