Geskryf deur: Gerda Potgieter
Artikelbron: Artikel verskaf
Om in ’n kind se ontwikkeling te belê, is baie belangrik en ’n belegging in die omgewing is ewe belangrik. Om bome aan te plant is ’n goeie manier om kinders te help om met die natuur kontak te maak. Emseni Farming weet dit alte goed en het onlangs meer as nege honderd lemoenbome aan die plaaslike gemeenskap geskenk om te plant. Dit is maar ’n deel van die opheffingswerk wat Emseni onder jongmense in die omgewing doen.
Emseni het verlede jaar ’n groentetuinprojek geloods wat daarop gemik is om kinders te leer om groentetuine in hul agterplase te begin. Duisende jong kinders van die omgewing het reeds groentesaailinge ontvang en die groentetuinprojek is goed aan die gang. Die projek is nou uitgebrei en vrugtebome is ook saam met die saailinge onder die entoesiastiese jong boere versprei. Die leerders van Laerskool Emthombeni het dadelik aan die werk gespring en kinders van alle ouderdomme het ywerig deelgeneem aan die pret om die jong boompies en saailinge in die grond te kry en te versorg.
Emthombeni is ’n openbare laerskool geleë in Maphumulo, naby Emseni. Die skool het sowat 300 leerders. Emseni is in die Kranskop-omgewing in KwaZulu-Natal geleë waar werksgeleenthede skaars is en die gemeenskap op landbou moet staatmaak om ’n bestaan te kan maak. Die program is prakties en het ten doel om ’n oplossing te bied vir die uitdagings van armoede deur inwoners die vaardighede te leer wat nodig is om hulself te kan help.
Landbou is een sektor waarin Suid-Afrika se jeug betekenisvolle werk kan kry en hoe gouer hulle begin leer om landbouvaardighede aan te leer, hoe beter is dit vir hulle. Bestaansboerdery, waar gemeenskapslede genoeg produseer vir hulself en ook hul bure, is maar een van die produktiewe maniere waarop kinders van kleins af kan begin om ’n verskil te maak.
Dietmar Joosten, plaasbestuurder van Emseni het die jeugontwikkelingsprogram in samewerking met verskeie belanghebbendes geïmplementeer. Hulle moedig jongmense in die gemeenskap aan om groente in hul agterplase te kweek, al is dit net op klein skaal.
Emseni werk al meer as 52 jaar lank in gebiede met gebrekkige hulpbronne om die gemeenskap te help om hul eie voedsel te kweek. Hulle bied saailinge, hulpbronne, opleiding en ondersteuning om hulle te help om voedseltuine in hul agterplase te ontwikkel en ondersteun hulle ook. Hulle leer hulle ook tegnieke en vaardighede om hul produksie ’n hupstoot te gee. Hierdie projek is nie net daarop gemik om jongmense aan te moedig om by die landbousektor aan te sluit nie, maar om verantwoordelikheid vir hul voedselbehoeftes te neem, klein te begin en groentetuine in hul agterplase te kweek vir voedselsekerheid in die toekoms.
(Lees meer oor die werk wat Emseni in die gemeenskap doen in Devoted, www.devotedmag.co.za)
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
Datum gepubliseer: 01/06/2023
Foto’s verskaf deur Devoted Magazine
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
