Artikelbron: www.acdp.org.za
“Die leier van die Anglikaanse Kerk van Suider-Afrika (ACSA), aartsbiskop Thabo Makgoba, het homself na my mening gediskwalifiseer om ’n geloofwaardige bemiddelaar in die Israel-Palestynse konflik te wees deur kant te kies,” het ACDP-leier eerw. Kenneth Meshoe in ’n mediaverklaring van die ACDP gesê.
Eerw. Meshoe het gereageer op ’n besluit deur die provinsiale staande komitee van ACSA om Israel as ’n apartheidstaat te bestempel.
Eerw. Meshoe het in die verklaring gesê: “Aartsbiskop Thabo Makgoba weet dat die Kerk ’n bediening van versoening ontvang het en moet dus om as ’n geloofwaardige fasiliteerder van versoening op te tree, objektief wees en nie kant kies met enige van die partye in die konflik nie. Die aartsbiskop het sy kommer oor die Palestyne uitgespreek, maar spreek nie soortgelyke kommer uit oor talle Israelse slagoffers van terreuraanvalle aan die hand van Palestynse terreurgroepe nie.
“Die aartsbiskop het volgens my sy kanse om ’n geloofwaardige bemiddelaar in die Israel-Palestynse konflik te wees verspeel en homself gediskwalifiseer deur kant te kies.
“Daar is geen geriewe of geboue, skole of universiteite wat slegs vir Joodse gebruik aangewys is soos dit tydens apartheid in Suid-Afrika gebeur het nie.
“Om Israel as ’n ‘apartheidstaat’ te bestempel is onakkuraat, kwaadwillig en sal nie help om vrede en harmonie in die Midde-Ooste te bevorder nie.
“Die besluit wat deur die Anglikaanse Kerk van Suider-Afrika geneem is om Israel as ’n ‘apartheidstaat’ te bestempel, skend die nagedagtenis van diegene wat onder die werklike apartheid van Suid-Afrika gely het. Nadat ek Israel by verskeie geleenthede besoek het, weet ek dat niks wat in daardie land gebeur, wat ek gesien of gelees het, met apartheid in Suid-Afrika vergelyk kan word nie.
“Diegene wat sê dat wat in Israel gebeur soos apartheid-Suid-Afrika is, minag die lyding wat swart Suid-Afrikaners verduur het. Hulle misken die pyn wat ons onder apartheid gely het. As Suid-Afrikaanse apartheid was soos dit in Israel daarna uitsien, sou Nelson Mandela en ander nooit nodig gehad het om tronk toe te gaan nie, want hulle sou al die regte geniet het wat Arabiere in Israel vandag het – soos die reg om te stem en die reg om te kies en vryheid van beweging.
“Daar is regters in Israelse howe wat nie Joods is nie en tog deur die wet toegelaat word om sake waarby Joodse verdagtes betrokke is, te hanteer. In apartheid Suid-Afrika was dit nie toegelaat nie. Jy het Arabiese onderwysers in Israel wat Joodse kinders onderrig. In apartheid Suid-Afrika kon swart onderwysers nooit wit kinders onderrig nie. Dit was ware apartheid in Suid-Afrika waar selfs aparte geriewe afgedwing is.
“Die aanklag dat Israel ’n ‘apartheidstaat’ is, is ’n leuen oor die ware Israel en dit is ’n leuen oor die ware apartheid wat in Suid-Afrika toegepas is.”
“Die betreurenswaardige besluit van die Anglikaanse Kerk van Suider-Afrika om Israel as ’n ‘apartheidstaat’ te bestempel, sal nooit deur die ACDP ondersteun word nie, aangesien dit op ’n leuen, politieke korrektheid en haat vir die enigste demokratiese Joodse staat in die Midde-Ooste gegrond is. ”
Klik hier om OP HOOGTE van die nuus te bly deur op ons GRATIS weeklikse nuusbrief in te teken.
Datum gepubliseer: 12/10/2023
Foto slegs ter illustrasie. Kunswerke aangepas uit wikimedia.org
VRYWARING
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
, aartsbiskop Thabo Mokgoba, het homself na my mening gediskwalifiseer om ’n geloofwaardige...){kind=link}
