Artikel verskaf deur Karoo Donkey Sanctuary
Karoo Donkey Sanctuary doen ’n beroep op die minister van landbou, Willie Aucamp, om die Afrika-unie se moratorium op die slag van donkies vir hul velle in werking te stel en ’n duidelike tydsplan bekend te maak om dié handel in Suid-Afrika te beëindig.
Die Donkey Sanctuary in die Verenigde Koninkryk skat dat minstens 5,9 miljoen donkies wêreldwyd jaarliks geslag word om in die vraag na donkievelle te voorsien. China se donkiebevolking het van ongeveer 11 miljoen in 1992 tot minder as twee miljoen in 2020 gedaal. Die bedryf het gevolglik toenemend na Afrika, Asië en Suid-Amerika begin kyk om in sy behoeftes te voorsien.
Die organisasie waarsku dat die voortgesette kommersiële slag van donkies dié diere blootstel aan ’n wêreldwye bedryf wat aangedryf word deur die vraag na ejiao, ’n gelatienproduk wat van donkievelle gemaak word en in tradisionele Chinese medisyne, skoonheids- en welstandsprodukte gebruik word.
“Suid-Afrika moet die Afrika-unie se verbintenis in daadwerklike beskerming omskep. Elke vertraging stel nog donkies in gevaar. Ons vra dat die minister duidelik aandui watter stappe die regering gaan neem, wie verantwoordelik gehou sal word en wanneer dit gaan gebeur,” sê Jonno Sherwin, stigter van Karoo Donkey Sanctuary.
’n Wêreldwye handel met verwoestende gevolge
Dierewelsynsorganisasies het ernstige dierelyding tydens die verkryging, vervoer en slag van donkies aangeteken. Dit sluit diere in wat oor lang afstande vervoer word sonder voldoende kos, water of rus. “Die omvang van hierdie handel is skokkend, maar dit is elke individuele dier wat ly. Elke donkie kan pyn en vrees ervaar. Elke donkie is meer werd as die prys wat iemand bereid is om vir sy vel te betaal,” sê Sherwin. Die gevolge raak ook gesinne wat op donkies staatmaak om water, kos en landbouprodukte te vervoer. Wanneer ’n donkie gesteel word of deur dié handel verlore gaan, kan ’n huishouding ’n noodsaaklike manier verloor om in sy eie behoeftes te voorsien.
Suid-Afrika moet die Afrika-unie se besluit uitvoer
In Februarie 2024 het leiers van die Afrika-unie ooreengekom om ’n moratorium op die slag van donkies vir die vellehandel in te stel. Die Afrika-unie se Inter-Afrikaanse Buro vir Dierehulpbronne (AU-IBAR) het sedertdien ’n beroep gedoen op sterker toepassing van die besluit op nasionale vlak, gekoördineerde wetstoepassing en optrede teen onwettige slagting en smokkelhandel.
’n Verslag deur die dierewelsynsorganisasie Brooke dui aan dat Suid-Afrika ’n beheerde uitvoermodel volg, met ’n jaarlikse maatstaf van 10 500 donkievelle. Karoo Donkey Sanctuary vra dat Suid-Afrika nie bloot die handel reguleer nie, maar die kommersiële slag van donkies vir hul velle heeltemal beëindig.
“‘Dierevriendelike slagting’ is die grootste teenstrydigheid van ons tyd,” sê Sherwin. “’n Kwota sê vir ons hoeveel velle tot die handel toegelaat word. Dit sê nie vir ons dat die diere teen lyding beskerm is nie. Suid-Afrikaners verdien deursigtigheid oor waar hierdie donkies vandaan kom, hoe hulle vervoer en geslag word en waarheen hul velle gaan.”
Karoo Donkey Sanctuary doen ’n beroep op die departement van landbou om:
- ’n Tydsplan bekend te maak vir die instelling van die Afrika-unie se moratorium in Suid-Afrika.
- Die kommersiële slag van donkies vir hul velle en die gepaardgaande uitvoer van donkievelle te beëindig.
- Huidige uitvoermagtigings, werklike slag- en uitvoersyfers, asook die owerhede wat vir toesig verantwoordelik is, bekend te maak.
- Wetstoepassing teen dieremishandeling, diefstal, onwettige slagting en smokkelhandel te verskerp, tesame met opleiding aan donkie-eienaars en handelaars oor die menswaardige hantering van die diere.
Reddingswerk strek verder as die hekke van die toevlugsoord
Die organisasie het reeds meer as 300 donkies uit die vellehandel gered. Nadat sommige van die diere vroeër by nuwe eienaars geplaas is, het 142 donkies nou ’n permanente tuiste by die toevlugsoord naby De Rust, saam met meer as 300 ander geredde plaasdiere. “Enigiemand wat tyd saam met ons donkies deurbring, sien hoe nuuskierig en intelligent hulle is en hoe hulle mense kan leer vertrou. Hulle vorm hegte bande, soek liefde en verdien om sonder vrees te leef. Ons verantwoordelikheid kan nie eindig by die diere wat ons reeds gered het nie,” sê Sherwin.
Die organisasie moedig lede van die publiek aan om aan minister Willie Aucamp te skryf by minister@nda.gov.za en te vra dat die Afrika-unie se moratorium in werking gestel word en ’n tydsplan vir optrede bekend gemaak word. Vir meer inligting oor die veldtog en die organisasie se werk, besoek karoodonkey.org of stuur ’n e-pos aan jonno@karoodonkey.org.
Oor Karoo Donkey Sanctuary
Karoo Donkey Sanctuary is in 2013 deur die diere-aktivis Jonno Sherwin gestig nadat hy vier donkies gered het. Die organisasie bied lewenslange versorging aan geredde diere op die plaas De Hoop naby De Rust in die Klein-Karoo. In 2017 het die organisasie 236 donkies gered wat op ’n slagveiling in Hartswater in die Noord-Kaap verkoop sou word. Benewens die versorging van geredde diere beywer die organisasie hom vir beter welsyn van donkies en die beëindiging van die handel in donkievelle.
Klik hier om OP HOOGTE van die nuus te bly deur op ons GRATIS weeklikse nuusbrief in te teken
> Ondersteun asseblief Christen-media en -joernalistiek in Suid-Afrika. Help ons om die Woord van God te verkondig en standpunt in te neem vir die waarheid deur ’n skenking aan ons bediening te maak. Ons waardeer jou ondersteuning. Klik hier om hande te vat met JUIG! Tydskrif.
Hoof foto en inhoud verkry vanaf Karoo Donkey Sanctuary webblad
Datum gepubliseer: 05/11/2026
VRYWARING: JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
