Geskryf deur: FEBA Radio
Toe Maria 14 jaar oud was, het haar oom haar seksueel aangerand. Sy was te bang om dit vir iemand te vertel, maar toe sy malaria kry en in die hospitaal beland, het die dokters haar meegedeel dat sy MIV-positief is. Die nuus het vinnig deur haar dorp versprei en sy moes die skool verlaat.
Op ’n dag het Maria ’n program op Victory FM, FEBA Mosambiek se radiostasie in Cuamba, gehoor wat oor mense met MIV gegaan het. Sy het die stasie gekontak om haar ervaring te deel. Vandag is sy een van die program se aanbieders.
Mosambiek het een van die hoogste MIV-syfers ter wêreld. Meer as 12% van mense tussen die ouderdomme van 15 en 45 leef met die virus, en dit kom meer by vroue voor as by mans.
FEBA Mosambiek se MIV-bewusmakingsprogram het vroeg in 2025 begin en het tans sowat 18 000 luisteraars. Dit word by Victory FM vervaardig, maar oor Sentraal-Mosambiek uitgesaai op FEBA se Impact FM en Zambezi FM (albei in die Zambezia-provinsie), asook Voice of Hope (Sofala-provinsie).
Programaanbieders voer onderhoude met mense wat MIV-positief is. Hulle vertel hoe hulle die virus opgedoen het, hoe mense op hul diagnose gereageer het, en hoe FEBA se dissipelskapprogram hulle help om hul situasie te hanteer. Volgens direkteur Bright Sonjera het die program ander mense aangemoedig om ook openlik oor hul ervarings te praat.
“Mense wat MIV-positief is, word steeds sleg behandel deur hul families,” sê hy. “Maar dit verbeter danksy ons uitsendings.”
Vir meer inligting oor FEBA en sy werk, besoek gerus www.febaradio.co.za.
Foto verskaf.
JUIG! Nuus is ’n Christen-nuusportaal wat vooraf gepubliseerde artikels deur skrywers van oral in die wêreld beskikbaar stel. Die skakel en oorspronklike bron van elke artikel word verskaf en die skrywer van elke artikel word ook aangedui (waar moontlik). Hoewel ons ook baie van ons eie artikels publiseer wat deur JUIG! se eie joernaliste geskryf is, skep ons nie uitsluitlik ons eie inhoud nie. Enige sienings of menings wat op hierdie webtuiste verskyn, is uitsluitlik dié van die skrywer en verteenwoordig nie noodwendig dié van die maatskappy nie.
